Atyraýda 11 mektepte oqýshylar úsh aýysymda oqıdy
Oblystyq bilim basqarmasy basshysynyń mindetin atqarýshy Aınagúl Dúısekenovanyń aıtýynsha, 200 mektepte alǵashqy qońyraý soǵylady. Sabaqqa 140 myńǵa jýyq oqýshy keledi.
«Bıyl Atyraý qalasyndaǵy 11 mektepte sabaq úsh aýysymda ótkiziledi. Munyń birneshe sebebi bar. Birinshiden, shahar turǵyndarynyń arasynda demografııalyq ósim baıqalyp otyr. Ekinshiden, buǵan kóshi-qon qozǵalysy áser etedi. Úshinshiden, orys synyptaryna sabaq beretin muǵalimder jetispeıdi. Óńirde tórt mektep apattyq jaǵdaıda turǵanyna qaramastan, bilim berý qyzmetin jalǵastyrady. Mundaı bilim ordasynyń bireýi Atyraý qalasynda ornalasqan. Bul mekteptiń jańa ǵımaratyn salý úshin tender ótkizilip, kelisimshartqa qol qoıý júrip jatyr. Al aýyldardaǵy osyndaı úsh mektep úshin jańa ǵımarattyń qurylysy bastaldy», - deıdi Aınagúl Dúısekenova.
Onyń deregine súıensek, Atyraý oblysynda 2021-2025 jyldar aralyǵynda jańadan 48 mekteptiń ǵımaratyn salý josparǵa engizilgen. Qazir 10 mekteptiń jáne 1 mekteptiń janynan japsarlas ǵımarat qurylysy júrip jatyr.
«Bıyl 6 mekteptiń qurylysyn júrgizýge respýblıkalyq bıýdjet esebinen 4 mlrd teńge bólindi. Jańa nysannyń beseýi Atyraý qalasynda, bireýi Inder aýdanynda salynady. Ózge mektepter úshin jer telimin bólý máselesi naqtylanyp jatyr. Bul mektepter paıdalanýǵa berilgen kezde qosymsha 20 myńǵa jýyq oqýshy mektepke qabyldanyp, 2 myńnan asa turaqty jumys orny ashylady», - dep málim etti Aınagúl Dúısekenova.
Eske sala ketelik, budan buryn Atyraý oblysynda mektep tapshylyǵy máselesin sheshý josparyn jazǵan bolatynbyz.
