Atyraýda 1,5 jasar sábı kólik salonynda kilttenip qalǵan

ATYRAÝ. QazAqparat – Atyraýda 1,5 jasar bala kólik salonynda kilttenip qalǵan, dep habarlaıdy QazAqparat tilshisi.

Oblystyq Tótenshe jaǵdaılar departamentiniń qoǵammen baılanys tobynan málim etkendeı, oqıǵaǵa qatysty búgin, 25 tamyz kúni saǵat 08:28-de shaqyrtý túsken.

«Qutqarýshylardy shaqyrtý Atyraý qalasynyń Geolog shaǵynaýdanyndaǵy B.Ermuhanov kóshesiniń turǵynynan tústi. Shaqyrtý ornyna jedel jetken qutqarýshylar 1,5 jastaǵy balanyń avtokóliktiń ishinde kilttenip qalǵanyn anyqtady», - dep habarlady departamenttiń qoǵammen baılanys tobynan.

Balanyń anasy kóliktiń kiltin salonda qaldyrǵan. Kólikte otyrǵan sábı esiktiń ishten jabylatyn tetigin basyp, keri asha almaı qalǵan.

Qutqarýshylar kóliktiń esigin avarııalyq-qutqarý quraldarynyń kómegimen ashty. Bala aman-esen anasyna tapsyryldy. Densaýlyǵy jaqsy bolǵandyqtan, medıtsınalyq kómekti qajet etpedi.

«Tótenshe jaǵdaılar departamenti ata-analardy saq bolýǵa, balalardy avtokólikte jalǵyz qaldyrmaýǵa jáne kiltti kólik ishinde qaldyrmaýǵa shaqyrady. Oqys oqıǵaǵa tap bolǵan jaǵdaıda 112 nómirine qońyraý shalý qajet», - dedi vedomstvodan.