Atyraý jastary Prezıdent Joldaýynda júktelgen mindetterdi qoldady
Kezdesýdi ashqan QR Aqparat jáne qoǵamdyq damý vıtse-mınıstri Danııar Esın Atyraý oblysynda memlekettik baǵdarlamalardy júzege asyrýdyń oń kórsetkishterin atap ótti.
Óńirdiń belsendi jastary jastar saıasatyna qatysty máselelerge nazar aýdardy. Memleket tarapynan jastarǵa qoldaý kórsetý jaıly aıtyldy. Qatysýshylardyń biri volonterler máselesin kóterdi. Prezıdent Qasym-Jomart Toqaevtyń tapsyrmasy boıynsha 2020 jyl Volonter jyly bolyp jarııalandy. Biraq bul qatarǵa kolledj stýdentteri kire almaıdy.
Berdibek Saparbaev Bilim jáne ǵylym mınıstrligine osy máseleni qaraýǵa tapsyrma beretinin aıtty. Elbasy jastar saıasatyn damytýǵa únemi kóńil bólip keldi.
Vıtse-premer Volonter jyly Jastar jylynyń logıkalyq jalǵasy bolatynyn atap ótti. Alda jastar bastamalaryn qoldaý baǵytynda úlken jumystar tur.
Atyraý oblysynyń ákimi Nurlan Noǵaev ta óz pikirin bildirdi. «Volonterlar qozǵalysy – bul borysh, ony yqylaspen atqarý kerek. Ózińdi jylytý arqyly ózgelerge sáýle syıla, qaıtarymyn kútpe degen sóz bar. Atyraýda negizgi qyzmeti bar, biraq bos ýaqytynda jedel járdemge baryp, adamdarǵa kómektesetin jigit bar. Naǵyz volonterlyq – osy», - dedi Nurlan Noǵaev
Kezdesýge stýdentter, jas kásipkerler men volonterlar jınaldy. Qatysýshylardyń biri bıznestegi alǵashqy qadamy jaıynda aıtty. Jastar vıtse-premerge ózderiniń alǵashqy jetistikteri týraly baıandady. Saparbaev óz kezeginde arman jolynda múmkindikterdi jiberip almaýǵa keńes berdi.
Vıtse-premer jastardy eńbek pen bilimge talpynýǵa, jat aǵymdar jeteginde ketpeı, bıznes negizderin meńgerip, memlekettik qoldaý baǵdarlamalaryn maqsatty paıdalanýǵa shaqyrdy.
Berdibek Saparbaev elimizdegi jastar qozǵalysynyń mańyzdylyǵyn atap ótip, dástúrimizdi umytpaý kerektigine toqtaldy. Bolashaqtaǵy órkendeýimizdiń negizi de osy bolmaq.
Óskeleń urpaqtyń máseleleri oblystyq daryndy balalarǵa arnalǵan ulttyq gımnazııadaǵy oqytýshylar quramymen bolǵan kezdesýde de qozǵaldy. Berdibek Saparbaev tárbıe máselesine toqtaldy.
«Otbasy tárbıesi, mádenı, moraldyq-adamgershilik qundylyqtaryna qatysty da problemalar bar. Muny ashyq túrde sheshý kerek. Osy baǵytta pedagogterdiń kómegi kerek», - dedi ol.
Kezdesýde sóılegen QR Bilim jáne ǵylym mınıstri Ashat Aımaǵambetov pedagog mártebesi týraly zań aıasynda qandaı josparlar baryn aıtty. Muǵalimder endi ózderin senimdi sezinetin bolady. Daıyndalǵan zań jobasy memleket basshysy qoıǵan orta bilim berý júıesin damytý, bilim sapasyn kóterý boıynsha mindetterge jaýap beredi. Zań jobasyn daıyndaýdyń basty ıdeıasy muǵalimderdiń júktemesin qysqartyp, tıesili emes mindetterdi atqarýdan qorǵaý, bos ýaqyttaryn ózderin damytýǵa, shyǵarmashylyqqa arnaýǵa negizdelgen.
«Biz munda muǵalimderdiń máselelerin sheshý úshin jınaldyq. Másele – bilim sapasynda. Eger bilim berý sapaly bolmasa, tárbıe protsesi de bolmaıdy, bul bizge paıdaly ma? Balalarymyzdy otansúıgishtikke, úlkenderdi qurmetteýge, bilim men eńbekke tárbıeleýimiz kerek», - dedi Berdibek Saparbaev. Premer-Mınıstr orynbasary Atyraý oblysynda bul baǵytta kóp jumys júrip jatqanyn atap ótti.
«Memleket basshysy qoıǵan mindetterdiń bárin oryndaımyz. Eki jyl buryn oblystyq bıýdjetten mektep túlekterine 221 grant bólindi. Onyń 176-sy bilim berý salasynda, ótken jyly 150-den astam grant berildi.Biraq áli kúnge deıin bastaýysh synyptar men orys tili muǵalimderi jetispeıdi. Bul problema sheshiledi.Úsh aýysymdyq mektepter máselesin sheshý úshin 9 mektep salýymyz kerek. Bıyl 2 mektep saldyq. Alty mekteptiń qurylysy júrip jatyr. Úsh mekteptiń jobalaý-smetalyq qujattamasy jasalýda», - dep atap ótti Nurlan Noǵaev.
