Atyraý polıtseıleri ózgeniń atynan onlaın-nesıe rásimdegen kúdiktini ustady
Atyraý oblystyq polıtsııa departamentiniń bastyǵy, polıtsııa polkovnıgi Qamza Úmbetqalıevtiń aıtýynsha, tártip saqshylary «Hi-tech» jedel profılaktıkalyq is-sharasy kezinde bank saıty arqyly ózgelerdiń atynan onlaın-nesıe rásimdep kelgen Shyǵys Qazaqstan oblysynyń 29 jastaǵy turǵynyn anyqtaǵan.
«Kúdikti jigit mıkroqarjylyq mekemeler arqyly ınternetten kezdeısoq adamdardyń málimetterin taýyp alyp, birneshe aı boıy olardyń atynan onlaın-nesıe rásimdep kelgen. Nesıe maquldanǵannan keıin «Kaspi Bank», «Halyk bank» bankomattary arqyly nesıe qarjysyn alyp otyrǵan. Jedel-izdestirý is-sharalary kezinde birneshe alaıaqtyq jasady degen kúdikti Semeı qalasynda ustaldy. Qazir kúdiktiniń 300-den astam alaıaqtyq deregine qatysy bary anyqtaldy. Jábirlenýshilerge keltirilgen shyǵynnyń jalpy kólemi birneshe mıllıonnan astam teńgeni qurady» -deıdi Qamza Úmbetqalıev.
Qazir kúdikti Semeı qalasyndaǵy ýaqytsha ustaý ızolıatoryna qamaldy. Kúdiktige qatysty QR Qylmystyq kodeksiniń 190-baby, 2-bóliminiń 4-tarmaǵymen, 190-baptyń 3-bóligimen (Alaıaqtyq) sotqa deıingi tergeý júrip jatyr.
Eske sala ketelik, budan buryn Atyraý turǵyny eki jyldan beri alaıaqtan 1,3 mln teńgesin qaıtara almaǵanyn jazǵan bolatynbyz.
