Atyraý oblysynyń Qyzylqoǵa aýdanynda ózen sýy tasýy múmkin
Oblystyq Tótenshe jaǵdaılar departamentiniń qoǵammen baılanys tobynan málim etkendeı, «Qazgıdromet» RMK mamandary 15-17 naýryz aralyǵynda Qyzylqoǵa aýdanynyń aýmaǵyndaǵy ózenderde sý deńgeıiniń kóterilýi múmkin ekenine boljam jasaǵan.
«Aqtóbe oblysyndaǵy ózen alqaptarynyń joǵary jaǵynan aǵyp keletin sýǵa baılanysty Atyraý oblysynyń Qyzylqoǵa aýdanyndaǵy ózenderde sý deńgeıiniń kóteriletini kútiledi. Mundaı jaǵdaıda aýdandaǵy eldi mekenderdi sý basý qaýpi týyndaıdy. Osyǵan baılanysty departament pen jergilikti atqarýshy organdar aldyn alý jóninde barlyq is-sharany atqaryp jatyr. Yqtımal sý tasqyny týraly boljam alynǵan kezde halyqty sırenanyń kómegimen, radıo jáne televızııalyq habar taratý jelisi arqyly, basqa da quraldarmen habardar etý júzege asyrylady. Tek resmı aqparattarǵa sengen jón», - dep habarlady departamenttiń qoǵammen baılanys tobynan.
Qyzylqoǵa aýdanynyń turǵyndaryna sý tasqyny qaýpi týraly habarlandyrý jasalǵannan keıin ne isteý kerektigi týraly keńes berildi.
«Bul týraly jaqyndaryńyzǵa, kórshilerińizge habarlap, balalarǵa, áıelderge, qarttar men naýqastarǵa kómek kórsetý kerek. Ahýal kúrdelener bolsa, oǵan aldyn ala daıyn bolý qajet. Mundaı kezde barlyq iri jáne qundy zattardy shatyrǵa nemese basqa qaýipsiz jerge qoıǵan jón. Sýdy, gazdy, elektr qýatyn, peshtegi otty sóndirýdi umytpaý kerek. Jertóleden barlyq azyq-túlik qoryn alyp, terezeler men esikterdi japqan durys. Qujattar men baǵaly zattar salynǵan sómkeni (rıýkzak) qoljetimdi jerge qoıǵan jón. Eń bastysy, dúrbeleńge salynbaı, sabyrlyq saqtaý», - dep málim etti vedomstvodan.
Eske sala ketelik, budan buryn Qyzylqoǵa aýdanynda sý basýy múmkin aýyldarǵa áýeden barlaý júrgizilgenin jazǵan edik.