Atyraý oblysynyń ekologııasyna zııan keltirip otyrǵan kásiporyndar ataldy

ATYRAÝ. QazAqparat – Atyraý oblysynda sońǵy 5 jylda ekologııany buzýǵa qatysty 47 oqıǵa tirkeldi. Soǵan baılanysty salynǵan aıyppul mólsheri 2,5 mlrd teńgeden asqan, dep habarlaıdy QazAqparat tilshisi.

Sybaılas jemqorlyqqa qarsy is-qımyl agenttigi Atyraý oblysy boıynsha departamentiniń basshysy Erlan Dosanovtyń aıtýynsha, «Týhlaıa balka» býlandyrý alańy men «Erik Mostovoı» drenaj júıesine monıtorıng júrgizilgen. Monıtronıng kezinde zań normasynda kózdelgen talaptar men bekitilgen jospardyń merzimi saqtalmaıtyny, sheshim qabyldaý kezinde túrli ákimshilik kedergi kezdesetini, sonyń saldarynan bıýdjet qarajatyn tıimsiz paıdalaný qaýpi bar ekeni anyqtalǵan.

«Sońǵy bes jylda Atyraý oblysynda qorshaǵan ortany búldirýge baılanysty 47 oqıǵa tirkeldi. Soǵan baılanysty 2,5 mlrd teńgeden astam somanyń aıyppuly salyndy. Ekologııaǵa keltirilgen zalal mólsheri 700 mln teńgeden asty. Qorshaǵan ortaǵa zııan keltiretin jaǵdaılar «AMÓZ», «Teńizshevroıl» JShS, «Embimunaıgaz» AQ, «North Caspian Operating Company N.V» fılıalynda anyqtalyp otyr.

Atyraý qalasynyń ekologııalyq ahýalynyń nasharlaýyna, jaǵymsyz ıistiń úzdiksiz qaıtalanýyna býlaný alańynda aǵyndy sýlardyń jınalýy sebep bolǵan. Qazir býlaný alańynyń 3 jáne 4-bóliginde jınalǵan sarqyndy sýdyń qurǵatylǵan 1 jáne 2-bólikke qaıtadan tógilý qaýpi týyndap tur. Saldarynan Atyraý qalasynyń ekologııalyq ahýalyn jaqsartý máselesi áli kúnge deıin sheshimin tappaı otyr», - dedi Erlan Dosanov.

Eske sala ketelik, buǵan deıin Atyraý ekologtary Reseımen shekaradaǵy Qıǵash ózeni sýynyń sapasyn teksergenin jazǵan bolatynbyz.