Atyraý oblysyndaǵy Inder kóline saraptamalyq zertteý júrgiziledi
Atyraý oblystyq kásipkerlik jáne týrızm basqarmasynyń bólim basshysy Jannat Sabyrǵalıevanyń aıtýynsha, 2025 jylǵa deıin týrızmdi damytý úshin 10,8 mlrd teńgeniń 9 ınvestıtsııalyq jobasy iske asyrylady. Bul jobalarda 338 jańa jumys orny ashylady.
«Onyń ishinde «Saraıshyq» vızıt ortalyǵyn salýǵa bıýdjetten qarjy bólindi. Al, 8 joba jeke ınvestıtsııa esebinen salynady dep josparlanyp otyr. Qazir 4 joba iske asyryldy. Bular – «Nurly tal» etno-parki, Qurmanǵazy aýdanyndaǵy eki týrıstik-demalys bazasy men Maqat aýdanyndaǵy kempıng. Bıyl oblystyń qolónershileri men dızaınerlerine qoldaý kórsetý maqsatynda halyqaralyq is-sharalar uıymdastyrylady. Qurmanǵazy aýdanyndaǵy lotos alqabynyń tanymaldyǵyn arttyrý úshin vıdeorolık ázirleý, Inder kóliniń quqyqtyq mártebesin aıqyndaý maqsatynda saraptamalyq zertteý jumystary júrgiziledi», -deıdi Jannat Sabyrǵalıeva.
Onyń deregine qaraǵanda, byltyr ishki jáne kirý týrızmi boıynsha kelýshilerdiń sany 108 158 adamdy quraǵan. Bul – aldyńǵy jylǵy kórsetkishpen salystyrǵanda 3 esege kóp. Sondaı-aq, ótken jyly 6 týrıstik nysanǵa QR kod ornatylǵan. Osylaısha, týrıster 5 tilde aqparat alyp, 3D týr jasaý múmkindigine ıe bolǵan.
Al, kópbalaly, az qamtylǵan otbasylardyń balalaryna «Óz elińdi tanyp bil» jobasy aıasynda Astana, Almaty, Aqtaý qalalaryna ekskýrsııalar uıymdastyrylǵan.
Eske sala ketelik, buǵan deıin Prezıdent tapsyrmasyna sáıkes Atyraýda qurylysy toqtaǵan kontsert zalynyń ornyna mádenıet ortalyǵy salynatynyn habarlaǵan edik.