Atyraý oblysynda Jaıyq ózeniniń jaǵalaýyn bekitý merziminen keshigýi múmkin
Bul týraly Atyraý oblysynyń ákimi Serik Shápkenovtiń Mahambet aýdanyna sapary kezinde belgili boldy.
Óńir ákiminiń baspasóz qyzmetinen málim etkendeı, aýdan ortalyǵy – Mahambet aýylynyń tusynda Jaıyq ózeniniń 4,5 shaqyrym jaǵalaýyn bekitý jumystary 2021 jyly bastalǵan. Sodan beri jaǵalaýda birneshe tsıkldy jumystar atqarylǵan.
«Qazir ózen jaǵalaýynda kólbeý, keri súzý súzgisin qalyptastyrý, monolıtti rostverk quıý, ony symmen toqý, baǵanalar men temir shpýnt qaǵý, tasty qabatty ornalastyrý sekildi jumystar júrgizilip jatyr. Jaǵalaýdy bekitý jobasyn bıylǵy shildede aıaqtaý josparlanǵan. Alaıda, qazir munda jumys kúshiniń tapshylyǵy baıqalady. Tehnıka sany da jetkiliksiz. Jumys tıisti deńgeıde uıymdastyrylmaǵan. Óndiristik jumystar bekitilgen kesteden keshigip jatyr. Bul kemshilikter jumystyń ýaqytyly aıaqtalmaı qalýyna sebep bolýy múmkin», -dep habarlady baspasóz qyzmeti.
Bul aýdandaǵy Alǵa aýylynyń tusynda da ózen jaǵasyn bekitý jumystary qolǵa alynǵan. Jaǵalaýda birinshi jáne ekinshi arnany qazý, 800 metr baǵana qaǵý, ÁJ-10 jelisin aýystyrý jumystary júrgizilýde.
«Sáýir aıynda qajetti materıaldar jetkiziledi. Sodan soń qazylyp alynǵan topyraqty arnaıy orynǵa tasymaldaý jumystary bastalady», -dep málim etti ákimdiktiń baspasóz qyzmetinen.
Eske sala ketelik, budan buryn Atyraý oblysynda Jaıyq ózeniniń jaǵalaýyn bekitýge 12 mlrd teńge bólingenin habarlaǵan bolatynbyz.