Atyraý oblysynda Tabyldy Dosymov pen Murat Móńkeulyna eskertkish qoıyldy

ATYRAÝ. QazAqparat- Atyraý oblysynyń Inderbor kentinde zar zaman aqyny Murat Móńkeuly men bard aqyn Tabyldy Dosymovqa arnalǵan eskertkish qoıyldy, dep habarlaıdy QazAqparat tilshisi.

Murat baba eskertkishiniń avtory - QR sýretshiler odaǵynyń múshesi Quttybek Jaqyp. Bıiktigi 7 metr bolatyn eskerkish taza qoladan quıylǵan. Eliniń táýelsizdigin ańsap jyr tolǵaǵan maıtalman jyrshy, termeshi retinde Murat Móńkeuly halyq arasynda tanylǵan. Saltanatty sharaǵa qatysqan Atyraý oblysy ákiminiń birinshi orynbasary Serik Shapkenov aımaq basshysy atynan búgingi aıtýly merekemen quttyqtady.

«Qazaqtyń zar zaman aqyny Murat Móńkeulyn tanymaıtyn qazaq joq. Óziniń rýhqa toly óleńderimen halyq jadynda máńgi saqtalady. Búgingi bizdiń mindetimiz - uly tulǵalarymyzdy ulyqtaý. Osy arqyly jas urpaqty tárbıeleýimiz kerek. Búgin Inderbor kentinde Murat Móńkeuly men Tabyldy Dosymovqa arnalǵan eskertkish boı kóterdi. Ashylǵaly turǵan eki eskertkish qutty bolsyn»,-deıdi Serik Shapkenov.

Sonymen qatar, qazaqtyń tuńǵysh bard aqyny Tabyldy Dosymovqa arnalǵan eskertkishtiń de saltanatty ashylýy ótti. Sharaǵa Tabyldynyń zamandastary, qoǵam qaıratkerleri qatysty. Bıiktigi 2 metr 60 sm bolatyn eskertkish taza qoladan quıylǵan. Tabyldy aqynnyń 45 jasynda ómirden ótýin bildiretin 4,5 metrlik granıt tasqa óleńderi jazylǵan. Sondaı-aq, Tabyldy murasynyń keıingi urpaqqa jalǵasýyn beıneleıtin granıttyń ushar basynda qustar beınelengen. Eskertkishtiń avtory - QR sýretshiler odaǵynyń múshesi Baqytbek Muhametjanov.

«Men qazaqpyn» dep jahanǵa jar sala jyrlaǵan jalyndy aqyn kindik qany tamyp, ómiriniń sońǵy kúnderin ótkizgen týǵan topyraǵynda búgin sáýletti eskertkish boı kóterip otyr. Tabyldy qazaq jadynda máńgilik saqtalady. Murat Móńkeuly azattyqty armandasa, Tabyldy bıiktikti ańsady. Eki tulǵanyń búginde armany oryndaldy»,- deıdi aqyn, Tabyldynyń zamandasy Svetqalı Nurjan.

Aıta keteıik, qazaqtyń zar zaman aqyny Murat Móńkeuly men bard aqyn Tabyldy Dosymov Inder aýdanynda jerlengen.