Atyraý oblysynda sýdaǵy qaýipsizdikti buzǵandarǵa 741 myń teńge aıyppul salyndy
Oblystyq tótenshe jaǵdaılar departamentiniń qoǵammen baılanys tobynan málim etkendeı, jyl basynan beri sý aıdyndarynda 10 adam qaza tapqan. Onyń ishinde 3 bala bar.
«Shomylý maýsymy bastalǵan 1 maýsymnan beri 3 adam sýǵa batyp ketti. Sýǵa batqandardyń 2-eýi kámeletke tolmaǵan bala. Statıstıkalyq derekke sáıkes sýdaǵy jazataıym oqıǵalardyń 95 paıyzy mas kúıinde shomylý, sýda júzý qabiletin asyra baǵalaý saldarynan bolyp otyr. Al, balalar ata-ananyń qaraýynsyz sýǵa shomylýdan oqys oqıǵanyń qurbany bolady. Keıbir adamdar densaýlyǵynyń kúrt nasharlaýy men qurysýdan sýǵa batyp ketedi», -dep habarlady departamenttiń qoǵammen baılanys toby.
Qazir sýda jazataıym oqıǵalardy boldyrmaý úshin tótenshe jaǵdaılar departamentiniń, polıtsııa qyzmetkerleriniń, Atyraý qalasy men aýdandar ákimdikteriniń ókilderi kúndelikti úgit-nasıhat jumystaryn jalǵastyryp otyr. Oǵann Ulttyq ulannyń kúshteri men 4 eriktiler uıymy tartylǵan. Azamattyq qorǵaý organdarynyń qyzmetkerleri sý aıdyndarynda qaýipsizdik qaǵıdalaryn túsindiredi. Negizgi qorǵaý quraldaryn, sondaı-aq zardap shekkenderge alǵashqy dárigerlik kómek berý tásilderin kórsetedi.
«Sý aıdyndarynda shomylý kezinde tótenshe jaǵdaılardyń aldyn alý maqsatyndaǵy kúndelikti reıdtik is-sharalarǵa 273-ten astam adam men 44 tehnıka jumyldyrylyp otyr. Atyraý qalasyndaǵy, Jylyoı jáne Qurmanǵazy aýdanyndaǵy úsh sýda qutqarý stansasynda jedel-qutqarý jasaǵynyń qyzmetkerleri táýlik boıy kezekshilikti júzege asyryp otyr. Maqsat – azamattardyń sýdaǵy qaýipsizdik talaptaryn buzýyna jol bermeý. Soǵan qaramastan QR Ákimshilik quqyq buzýshylyq týraly kodekstiń 364-babynyń 1 jáne 2-bóligin, 440-babynyń talabyn buzýshylarǵa 82 hattama toltyrylyp, 741 myń 286 teńgege aıyppul salyndy», -dep málim etti qoǵammen baılanys tobynan.
Eske sala ketelik, buǵan deıin Atyraý oblysynda jyl basynan beri 10 adam sýǵa ketkenin habarlaǵan edik.