Atyraý oblysynda sarmat jaýyngerleriniń súıegi tabyldy
H.Dosmuhamedov atyndaǵy Atyraý ýnıversıtetiniń rektory Salamat Idrısovtyń aıtýynsha, oqý ornynyń ǵalymdary qazba jumysyn júrgizýge ruqsat alǵan. Soǵan oraı, arheologııalyq ekspedıtsııa temir dáýirine jatatyn qorǵandardy zertteýge attanǵan. Mundaı qorǵandar Qyzylqoǵa aýdanyndaǵy Muqyr aýyldyq okrýginiń aýmaǵynda ornalasqan.
«Bizdiń ýnıversıtettegi H.Tabyldıev atyndaǵy Kaspıı óńiriniń tarıhy, arheologııasy jáne etnologııasy ǵylymı zertteý ınstıtýtynyń 3 ǵylymı jetekshisi men 20 stýdenti Muqyr aýyldyq okrýgine qarasty Qaraqudyq ýchaskesinde qorǵandarǵa qazba jumysyn júrgizdi. Qazba jumysy kezinde tarıhı jádigerdiń ústinen tústik. Munda sarmat dáýirine jatatyn jaýyngerlerdiń súıegi tabyldy», - deıdi atalǵan ǵylymı zertteý ınstıtýtynyń dırektory, tarıh ǵylymdarynyń doktory Saıfolla Sapanov.
Onyń aıtýynsha, bir qorǵanda úsh jaýyngerdiń biriniń tusyna qarý-jaraqtary men 2 myń jyl burynǵy qumyra, 4 qoı tabylyp otyr. Qorǵanda naıza, beldikte pyshaq, bir qorap jebe bolǵan.
«Arheologııalyq ekspedıtsııanyń biri kezeńinde bir qorǵannan osyndaı jádigerlerdi taptyq. Bir qorǵanda 3 adamnyń jerlenýi arheologııada sırek kezdesedi. Muny biz sarmat dáýirindegi jaýyngerler degen tujyrym jasap otyrmyz. Bir jaýyngediń oń qolynyń bilekten kesilgenine qaraǵanda, soǵysta qaza tabýy múmkin. Qolbasshy bolǵan da shyǵar. Sol sebepten, endi jaýyngerlerdiń súıegine antropologııalyq zertteý júrgiziledi» - deıdi arheologııalyq ekspedıtsııa jetekshisi Saıfolla Sapanov.
Ekspedıtsııa jetekshisiniń pikirine súıensek, endi arheologııalyq ekspedıtsııanyń ekinshi kezeńine arheologtar tartylmaq.
«Sondaı arheologtyń biri – B.Gorodıvıkov atyndaǵy Qalmaq memlekettik ýnıversıtetiniń professory, tarıh ǵylymdarynyń doktory Petr Koltsov. Jaqynda bul ǵalym bizdiń ekspedıtsııa quramyna qosylyp, qorǵannan tabylǵan sarmat dáýirindegi jaýyngerlerdiń súıegine, ózge jádigerlerge ǵylymı zertteý, taldaý júrgizedi» -dep pikir bildirdi S.Sapanov.
Eske sala ketelik, byltyr tamyz aıynda Atyraý oblysyndaǵy Mııaly qorǵanynan teńdesi joq temir saýytty jaýynger tabyldy.
