Atyraý oblysynda ózge óńir turǵyndarynan 262 gramm esirtki tabyldy
Oblystyq Polıtsııa departamentiniń baspasóz qyzmetinen málim etkendeı, kúdiktiler «Qarasora» is-sharasy kezinde qolǵa túsken.
«Esirtki qylmysyna qarsy is-qımyl basqarmasy men Ulttyq qaýipsizdik komıtetiniń Atyraý oblystyq departamentiniń qyzmetkerleri Atyraý qalasynda sıntetıkalyq esirtki saqtaǵan kúdiktilerdi ustady. Olardan esirtkiniń 200-ge jýyq dozasy tárkilendi. Máselen, Shyǵys Qazaqstan oblysynyń 1981 jyly týǵan turǵynynan tárkilengen esirtki zatynyń salmaǵy 64,2 gramm «Alfa-PVP» sıntetıkalyq esirtkisi ekeni anyqtaldy. Oǵan qatysty QR Qylmystyq kodeksiniń 296-baby 4-bóligimen sotqa deıingi tergep-tekserý bastaldy», - dep habarlady departamentttiń baspasóz qyzmetinen.
Budan bólek, Atyraý qalasynyń «Nursaıa» shaǵynaýdanynda asa iri mólsherdegi sıntetıkalyq esirtkini jasyryp ketý ádisimen satyp kelgen kúdikti anyqtaldy.
«Taraz qalasynyń 1987 jyly týǵan turǵyny ustaldy. Medıtsınalyq saraptama qorytyndysyna sáıkes tárkilengen zattyń salmaǵy 70,09 gramm «Alfa-PVP» jáne 128,31 gramm «Mefedron» sıntetıkalyq esirtki ekeni anyqtaldy. Kúdiktige qatysty QR Qylmystyq kodeksiniń 297-baby 3-bóligimen sotqa deıingi tergeý júrip jatyr», - dep málim etti vedomstvodan.
Ózge aqparat QR Qylmystyq-protsestik kodeksiniń 201-babyna sáıkes jarııalanbady.
Budan buryn Abaı oblysynyń turǵyny Atyraýda 1,5 myń doza esirtkini zańsyz saqtaý kúdigimen ustalǵanyn jazǵan edik.
Sondaı-aq Esirtki qylmysyna qarsy is-qımyl basqarmasynyń qyzmetkeleri Atyraý qalasyndaǵy iri munaı óńdeý mekemeleriniń laboratorııalaryna tekserý júrgizdi. Nátıjesinde 20 tonnaǵa jýyq prekýrsor tabyldy.
Atyraý oblysynda bıylǵy 6 aıda esirtkige baılanysty 63 qylmys tirkeldi.
