Atyraý oblysynda munaıǵa uqsas suıyqtyq tógilgen jer tabyldy
Bul týraly keshe, 24 qarashada Whatsapp messendjeri men áleýmettik jelide aqparat taraǵan edi.
Óńirlik kommýnıkatsııalar qyzmetiniń aqparatyna qaraǵanda, oqıǵa Qurmanǵazy aýdanyndaǵy Súıindik aýyldyq okrýgine qarasty «Ydyrys» qystaýynyń mańynda bolǵan. Atalǵan aýmaqta «Smart Oıl» JShS barlaý-burǵylaý jumysyn júrgizip jatyr.
«Búgin, 25 qarashada áleýmettik jelide taraǵan aqparatty tekserý úshin Súıindik aýyldyq okrýginiń ákimi, ýchaskelik polıtsııa ınspektory men beınerolık taratqan jergilikti turǵyn «Ydyrys» qystaýynyń mańyndaǵy aýmaqqa bardy. Batyrbek aýylynan 8-9 shaqyrym «Smart Oıl» JShS barlaý-burǵylaý jumysyn júrgizip jatqan jerde munaı ónimine uqsas qara suıyqtyqtyń tógilgen orny anyqtaldy. Búlingen jerdiń jalpy aýmany shamamen 50 sharshy metrdi quraıdy. Bul derek búgin tańerteń, 25 qarashada Qurmanǵazy aýdandyq polıtsııa bóliminde tirkeldi. Qazir munaı ónimderine uqsas suıyqtyq tógilgen jerge jedel-tergeý toby attanyp ketti», -dep málim etti óńirlik kommýnıkatsııalar qyzmetinen.
«Smart Oıl» JShS bıyl jyldyń tamyz aıynan beri Súıindik aýyldyq okrýgine qarasty «Ydyrys» qystaýyna jaqyn mańda barlaý-burǵylaý jumystaryn júrgizip keledi. Bul qystaý Qurmanǵazy aýdanynyń ortalyǵynan 250 shaqyrym qashyqtyqta ornalasqan.
Eske sala ketelik, buǵan deıin Atyraý oblysynda úsh jerge munaı ónimderi tárizdes suıyqtyq tógilgeni anyqtalǵanyn, keıin taǵy bir aýmaq munaı ónimine uqsaıtyn suıyqtyqpen búlingenin jazǵan edik.