Atyraý oblysynda memlekettik qyzmetshilerdiń 83 paıyzy deklaratsııa tapsyrǵan
Atyraý oblysynyń ákimi Serik Shápkenovtiń tóraǵalyǵymen quqyq buzýshylyq profılaktıkasy jáne sybaılas jemqorlyqqa qarsy is-qımyl máseleleri jóninde vedomostvoaralyq komıssııanyń otyrysy ótti.
Onda jalpyǵa birdeı deklaratsııalaýdy engizý týraly, atqarýshy organdardyń normatıvtik-quqyqtyq aktiler jobasyna júrgizilgen sybaılas jemqorlyqqa qarsy ǵylymı saraptama qorytyndysyna monıtorıng jáne «Atyraý» áleýmettik-kásipkerlik korporatsııasy» AQ qyzmetindegi sybaılas jemqorlyq táýekelderine syrtqy taldaý nátıjeleri qaraldy.
Oblystyq memlekettik kirister departamenti basshysynyń orynbasary Beken Shanaevtyń málimetinshe, bıyl 15 834 memlekettik kyzmetshi deklaratsııa tapsyrýy tıis.
«Osy kezge deıin 13 194 memlekettik qyzmetker deklaratsııa tapsyrdy. Bul memlekettik qyzmetkerlerdiń 83 paıyzyn qurap otyr. Kelesi jyldan bastap memlekettik mekemeler men kvazımemlekettik sektor qyzmetkerleri, olardyń jubaılary deklaratsııa tapsyrý men ony toltyrý nusqaýlyqtaryn úıretý is-sharalaryna oblys kóleminde jumsalatyn qarjyny bıýdjet esebinen bólýdi suraımyn», -dedi Beken Shanaev.
Sybaılas jemqorlyqqa qarsy is-qımyl agenttigi Atyraý oblysy boıynsha departamentiniń basshysy Erlan Dosanovtyń aıtýynsha, atqarýshy organdardyń normatıvtik-quqyqtyq aktiler jobasy boıynsha sybaılas jemqorlyqqa qarsy ǵylymı saraptama qorytyndysyna monıtorıng júrgizilgen. Bul jumystarǵa respýblıkalyq bıýdjetten 900 mln teńgeden astam qarajat bólingen.
«Qazir «Atyraý» áleýmettik-kásipkerlik korporatsııasy» AQ-daǵy basty problemalyq máseleniń biri – kadr saıasaty. Jumysqa qabyldaý atalǵan laýazymǵa kandıdattyń sáıkestigin aldyn ala qaraý rásiminsiz júzege asyrylady. Qyzmetkerlerdiń biliktilik talaptary bekitilmegen. Resmı saıtta nemese áleýmettik jeliler paraqshasynda bos laýazymdar týraly qandaı da bir aqparat jarııalanbaıdy», -deıdi departamentke qarasty preventsııa basqarmasy basshysynyń orynbasary Ǵıbat Kýkatov.
Oblys ákimi Serik Shápkenovtiń pikirinshe, sybaılas jemqorlyqpen kúres – memlekettik saıasattyń basty baǵyty.
«Sol sebepten, biz óz tarapymyzdan jemqorlyqpen kúresýdiń alǵashqy qadamy retinde ashyqtyqty talap etýimiz qajet. Memlekettik jobalardy iske asyrýda ashyqtyq pen jarııalyq prıntsıpteri saqtalýy kerek. Turǵyndar úshin kez-kelgen aqparat qoljetimdi bolýy tıis», -dedi Serik Shápkenov.
Eske sala ketelik, buǵan deıin Atyraý oblysynda 2 myńǵa jýyq jumyssyz adamdy oqytýǵa 158 mln teńge bólingen bolatyn.
