Atyraý oblysynda qyrylǵan qustardyń sany 5 myńnan asty
Qara shubar tuqymdy shaǵalanyń jappaı qyrylý deregi Kaspıı teńizindegi «Qashaǵan» ken ornynda ornalasqan eki jasandy aralda anyqtalǵan. Qyrylǵan qustardyń sany – 2 750.
Osyǵan oraı, Atyraý oblystyq Orman sharýashylyǵy jáne janýarlar dúnıesi aýmaqtyq ınspektsııasynda qustardyń ólý sebepterin anyqtaý úshin komıssııa quryldy. Komıssııa músheleri qustar qyrylǵan jerge baryp, onda profılaktıkalyq tekserýler júrgizdi. Sol jerden sý, topyraq jáne aýa synamalary, qustardyń ólekseleri zertteýge alyndy.
«Bes kúnnen keıin, ıaǵnı 24 maýsymda Aýyl sharýashylyǵy mınıstrligi veterınarııalyq baqylaý jáne qadaǵalaý komıtetiniń veterınarııa boıynsha ulttyq referenttik ortalyǵynan ólgen qustardyń synamalarynan «AN5 qus tumaýyna» oń nátıje anyqtalǵany týraly jaýap keldi. Osyǵan baılanysty Atyraý oblysynyń aýmaǵynda quzyretti organdardyń qatysýymen uqsas jaǵdaılardy anyqtaý maqsatynda tolyq baqylaý monıtorıngi júrgizildi. 26 maýsymda Kaspıı teńiziniń soltústik bóliginde ornalasqan Shalyga aralyndaǵy «Aqjaıyq» memlekettik tabıǵı rezervatynyń aýmaǵynda 2500 shaǵalanyń ólý deregi anyqtaldy. Onyń ishinde 1000 «Chegrava», 1 200 «Qara bas ógizshaǵala», 300 «Ógizshaǵala» tuqymdy qus qyrylǵan», -dep málim etti oblystyq ákimdiktiń baspasóz qyzmetinen.
«Aqjaıyq» memlekettik tabıǵı rezervatynyń aýmaǵynda ólgen qustardyń ólý sebebin anyqtaý úshin bıomaterıaldar alyndy. Bıomaterıaldar Almaty qalasyndaǵy Mıkrobıologııa jáne vırýsologııa ınstıtýtyna jiberildi.
Qustardyń qyrylý sebebi synamalar qorytyndysy shyqqannan keıin qosymsha habarlanatyn bolady. Qazir Atyraý oblysynyń aýmaǵynda qustardyń jaǵdaıyna tolyq monıtorıng júrgizilip jatyr», -dep habarlady ákimdiktiń baspasóz qyzmeti.
Eske sala ketelik, buǵan deıin «Aqjaıyq» memlekettik tabıǵı rezervatynyń aýmaǵynda qustar qyrylyp jatqany habarlanǵan edi.
