Atyraý oblysynda koronavırýs ınfektsııasynan 2 adam qaıtys boldy

ATYRAÝ. QazAqparat – «Qyzyl» aımaqtaǵy Atyraý oblysynda koronavırýs ınfektsııasynan 2 adam qaıtys boldy, dep habarlaıdy QazAqparat.

Oblystyq densaýlyq saqtaý basqarmasynyń baspasóz qyzmetinen málim etkendeı, ótken táýlikte 148 adamnan koronavırýs ınfektsııasy anyqtalǵan.

«Óńirdegi 2 360 tósek-orynǵa arnalǵan ınfektsııalyq statsıonarlarda koronavırýspen aýyrǵan 256 adam (júkteme 10,8%) emdelip jatyr. Al, statsıonarlardaǵy 106 orynǵa eesptelgen jansaqtaý bóliminde jaǵdaıy aýyr 21 naýqas oqshaýlanǵan. Onyń ishinde jaǵdaıy óte aýyr 3 patsıent ókpeni jasandy jeldetý apparatyna qosylǵan. Bul bólimdegi júkteme – 19,8%. Ótken táýlikte qaýipti vırýstan 2 naýqas qaıtys boldy», -dep habarlady basqarmanyń baspasóz qyzmeti.

Eske sala ketelik, buǵan deıin Atyraý oblysynda koronavırýs ınfektsııasymen 5 808 adam aýyryp jatqanyn habarlaǵan edik.