Atyraý oblysynda byltyr 34 mlrd teńgeden astam qarjy ıgerilmeı qalǵan
Oblystyq Qarjy basqamasynyń basshysy Meıirjan Muqasovtyń málimetinshe, ótken jyly óńir bıýdjetiniń ıgerilmegen qarjysy 29 mlrd 218,6 mln teńgeni quraǵan. Buǵan qosa respýblıkalyq bıýdjetten berilgen transfertter men kredıttiń 4 mlrd 818 mln teńgesi ıgerilmegen.
«Ótken jyldyń qorytyndysymen jergilikti bıýdjet 670 mlrd 965 mln teńge kóleminde josparlanǵan edi. Byltyr jergilikti bıýdjetke 694 mlrd 218,6 mln teńge tústi. Al respýblıkalyq bıýdjet transfertteriniń túsimi 127 mlrd 166,2 mln teńgeni qurady. Oblys bıýdjetiniń shyǵysy 95,8 paıyzǵa oryndalyp, ıgerilmegen qarajat 29 mlrd 482,4 mln teńgeni qurap otyr.
Respýblıkalyq bıýdjetten transfertter men kredıttiń ıgerilmegen qarajatynyń kólemi – 4 mlrd 818 mln teńge. Buǵan qurylys materıaldary baǵasynyń qymbattaýyna baılanysty ınjenerlik-kommýnıkatsııalyq ınfraqurylymdar jobalaryna túzetý engizilýi men merdigerlerdiń jumys kestesinen qalys qalǵany sebep bolǵan. Sondaı-aq byltyr Úkimettiń rezerv qorynan bólingen 1 mlrd 331,3 mln teńge tolyǵymen ıgerildi», - dep habarlady Meıirjan Muqasov.
Onyń aıtýynsha, qala jáne aýdandardyń kommýnaldyq menshigindegi 122 múlik satylyp, bıýdjetke 94,6 mln teńge túsken. Sondaı-aq 232,1 mlrd teńgeniń 386 konkýrsy uıymdastyrylǵan. Bul konkýrstar arqyly únemdeý 6,8 mlrd tengeni quraǵan.
Eske sala ketelik, buǵan deıin Atyraýda ınfraqurylym jelilerimen qamtýǵa 3,1 mlrd teńge bólingenin habarlaǵan edik.
