Atyraý oblysynda brakonerlerden 2,5 tonna balyq tárkilendi
Oblystyq polıtsııa departamenti baspasóz qyzmetiniń aqparatyna súıensek, 10 qyrkúıek pen 31 qazan aralyǵynda «Bekire-2022» jedel-profılaktıkalyq is-sharasy ótkizildi. Іs-shara kezinde Atyraý qalasy aýmaǵynda ornalasqan «Atyraý-Damby», «Atyraý-Oral», «Atyraý-Astrahan» tas joldaryna statsıonarlyq baqylaý-ótkizý beketteri qoıyldy.
Atyraý qalalyq polıtsııa basqarmasy, barlyq aýdandyq polıtsııa bólimderi Kaspıı teńizi men Jaıyq ózeniniń jaǵalaýynda, oblystaǵy aınalma joldarda avtokólik quraldarynyń qozǵalysyn baqylaý úshin mobıldik toptar qurylǵan. Jedel basqarý ortalyǵy arqyly Jaıyq ózeniniń Atyraý qalasyndaǵy jaǵalaýynda balyqty brakonerlik jolmen aýlaýdyń jolyn kesý úshin beınebaqylaý kameralary udaıy tekserý júrgizilgen.
«Osyndaı is-sharalardyń nátıjesinde balyq qorynyń zańsyz aınalymyna baılanysty 153 quqyq buzýshylyq anyqtaldy. Onyń ishinde zańsyz balyq aýlaýǵa, balyq aýlaý erejelerin buzýǵa qatysty 145, balyq jáne balyq ónimderin zańsyz satýmen baılanysty 3, balyq jáne balyq ónimderin zańsyz tasymaldaǵan 5 derek tirkeldi. Balyq qoryna zańsyz qol suqqan 154 quqyq buzýshy ustalyp, olardan 2 tonna 538 keli balyq tárkilendi. Onyń ishinde 438 keli bekire tuqymdas balyqtar bar. Quqyq buzýshylardan 153 balyq aýlaý jáne 3 sý kólik quraldary alyndy. QR Ákimshilik quqyqbuzýshylyq týraly kodeksiniń 383-babymen (Balyq aýlaý qaǵıdalaryn buzý) 143 adam jaýapkershilikke tartyldy», -dep habarlady departamenttiń baspasóz qyzmeti.
Eske sala ketelik, buǵan deıin Atyraý oblysynda brakonerlerden 134 keli bekire tárkilengenin habarlaǵan edik.
Foto : gov.kz