Atyraý oblysynda bıyl mektep bitirgen túlekterge 4 myń grant bólindi
Oblystyq bilim basqarmasy basshysynyń mindetin atqarýshy Aınagúl Dúısekenovanyń aıtýynsha, Prezıdent tapsyrmasyna sáıkes bólingen bilim granty túrli kásiptik, tehnıkalyq, gýmanıtarlyq baǵyttaǵy mamandyqtardy qamtyp otyr.
«Atyraý oblysynda 200 mektep bar. Bıyl mektepti 5 999 túlek bitirdi. Bıyl Atyraý óńiriniń túlekteri úshin 4 myń grant bólindi. Onyń 3200-i tehnıkalyq, al 800-i pedagogıkalyq mamandyqty tańdaǵan túlekterge beriledi. Bul mamandyqtardyń óńir úshin mańyzy zor. Óıtkeni, oblysta kadr tapshylyǵy bar. Qazir grantt ıelený úshin qujat qabyldaý júrip jatyr. Bul granttyń artyqshylyǵy – keıinnen eńbek ótili túrinde qaıtarý jaýapkershiligi qarastyrylmaǵan. Balalar shákirtaqy alyp, Qazaqstannyń eń úzdik joǵary oqý oryndarynda bilim alýyna tolyqtaı múmkindik berilgen» -dedi Aınagúl Dúısekenova.
Onyń aıtýynsha, áleýmettik jelide «Oqýshylar memlekettik nemese nysanaly grantty tańdaıdy. Kelesi jyly grant berilmeıdi» degen jalǵan aqparat taraǵan.
«Áleýmettik jelilerde taraǵan aýdıojazbaǵa senbeýlerińizdi suraımyn. Mektep bitirýshi túlekterge granttar jyl saıyn bólinedi. «Kelesi jyly bilim granttary berilmeıdi» degen aqparat shyndyqqa janaspaıdy. Jyl saıyn memleket tarapynan mınıstrlik jáne jergilikti ákim granty bólinetini týraly aqparattandyrý jumystary únemi júrgiziledi», -dedi ol.
Barlyq túlekke memlekettik grant pen óńirge bólingen maqsatty granttar týraly aqparat berilgen. Túlekter qaı grant konkýrsyna ótinish beretinin uıǵaryp, óz tańdaýyn jasaýy kerek.
Eske sala ketelik, budan buryn Atyraý oblysynda Altyn belgi úmitkerleriniń sany 40% artqanyn https://kaz.inform.kz/news/atyrau-oblysynda-altyn-belgi-umitkerlerinin-sany-40-artty_a3936917 habarlaǵan bolatynbyz.
Foto: inbusiness.kz