Atyraý oblysynda bıyl 16 ana ólimi tirkelgen

ATYRAÝ. QazAqparat – Atyraý oblysynda jyl basynan beri 16 ana ólimi tirkelgen, dep habarlaıdy QazAqparat.

Oblystyq densaýlyq saqtaý basqarmasy baspasóz qyzmetiniń málimetinshe, Izraıl eliniń dárigerleri eki aptalyq sheberlik saǵatyn bastady.

«Atyraý oblysynda bıylǵy 9 aıda ana óliminiń 16 deregi tirkeldi. Onyń ishinde 12 ana koronavırýs pandemııasy kezinde kóz jumǵan. Osyǵan baılanysty sheteldik dárigerlerdiń sheberlik saǵatyn uıymdastyrý qolǵa alyndy. Quramynda akýsherler men gınekolog mamandar bar dárigerler eki apta oblystyq perınataldyq ortalyqtyń patsıentterine, sondaı-aq, modýldik aýrýhananyń ınfektsııalyq statsıonarynda jatqan júkti áıelderge keńes beredi. Bosandyrý kezinde kórsetiletin shuǵyl em-domǵa taldaý júrgizip, klınıkalyq jaǵdaılardan shyǵý jolyn jergilikti dárigerlermen birge talqylaıdy» -dep habarlady basqarmanyń baspasóz qyzmeti.

Izraıldegi medıtsına mamandarynyń biliktiligin arttyrý ortalyǵynyń jetekshisi Natalıa Melehtiń aıtýynsha, sheberlik saǵatynda kúndelikti jumysta kómektesetin tájirıbelik daǵdylardy birlesip iske asyrý kózdelgen.

«Mundaı tájirıbe aımaqtaǵy ana óliminiń tómendeýine áser etedi dep úmitenemiz. Jergilikti mamandardyń jumysyn barynsha júıeleýge tyrysamyz. Atyraýdaǵy jumys saparymyzdyń aıasynda ózge de medıtsınalyq mekemelerdegi shuǵyl jaǵdaıǵa birlesip kómek kórsetýge daıynbyz», - deıdi Natalıa Meleh.

Eske sala ketelik, budan buryn Atyraýda elordalyq dárigerler 5 bala ota jasap, 300-ge jýyq keńes bergenin jazǵan bolatynbyz.