Atyraý oblysynda bilim mekemeleri balalarǵa dinı nasıhat júrgizgen

ATYRAÝ. QazAqparat – Atyraýda qaıyrymdylyq bilim mekemeleri dinı nasıhat júrgizgen, dep habarlaıdy QazAqparat.

Oblystyq bilim basqarmasynyń málimetinshe, 82 bala turatyn «Aqjaıyq», «Aısha ana», «Bereke», «Edil», «Saraıshyq» bilim berý qaıyrymdylyq mekemeleri 82 balaǵa dinı nasıhat júrgizýmen aınalysqan. Tekserý barysynda mekemelerde dinı saýattylyqqa úıretetin stendter, ádebıetter tabylǵan.

Al ata-analarmen kezdesý kezinde olar bul uıymdardy medrese dep ataıtyny anyqtaldy. Balalar munda ata-analarynyń senimhaty negizinde turady. Alaıda, bul – zańsyz. Bilim basqarmasy barlyq quzyretti organdarǵa hat joldaǵan. Qazir zertteý toby quryldy.

«Tekserý nátıjesinde mekemelerde qaýipsizdik sharalary saqtalmaǵany, psıhıkalyq jáne fızıkalyq damý úshin qolaıly jaǵdaılar bolmaǵany anyqtaldy. Balalardyń turýy úshin qajetti jaǵdaılar jasalmaǵan. Shtatta pán muǵalimderi bolmaǵan. Ata-analarmen kezdesý uıymdastyryldy. Olarǵa balalary úshin bul jerde bolý qaýipsiz emes ekeni eskertildi. Іs júzinde basqarma tıisti sharalar qabyldady. Qaıyrymdylyq mekemeleriniń qyzmetkerlerine balalardy úıge jiberý týraly usynystar berildi. Bilim berý mekemeleri tek zań aıasynda jumys isteýi kerek», - dep habarlady oblystyq Bilim basqarmasynan.

Eske sala ketelik, buǵan deıin Atyraýda​ balalar aýylynyń dırektory jumysynan shettetilgenin habarlaǵan bolatynbyz. Atyraý oblystyq Bilim​ basqarmasy basshysynyń buıryǵymen otbasylyq úlgidegi «Shańyraq» balalar aýylynyń dırektory Gúlsara Botataeva tergeý júrgizý ýaqytyna atqaratyn qyzmetinen shettetildi.

«Balalar úıi tárbıelenýshileriniń ótinishinen keıin QR Qylmystyq kodeksiniń 140-babymen («Kámeletke tolmaǵan balany tárbıeleý jónindegi mindetterdi oryndamaý») sotqa deıingi tergeý bastaldy. Tergeý aıaqtalyp, oqıǵanyń barlyq mán-jaıy anyqtalǵannan keıin dırektordyń jumysyn jalǵastyrý týraly sheshim qabyldanady», -dep habarlady basqarmanyń baspasóz qyzmeti.