Atyraý oblysynda balabaqshany talqandaǵan jasóspirimderdiń ata-analaryna aıyppul salyndy
Atyraý oblysynyń kámeletke tolmaǵandar isteri jónindegi mamandandyrylǵan aýdanaralyq sotynda kámeletke tolmaǵan balalardy tárbıeleý jónindegi mindetterdi oryndamaǵany úshin 6 ata-anaǵa qatysty ákimshilik quqyq buzýshylyq týraly is qaraldy.
«Bıylǵy 1 qazanda saǵat 15:00 shamasynda kámeletke tolmaǵan balalar Qulsary qalasyndaǵy balabaqsha ǵımaratyna zańsyz kirgen. Olar balabaqshadaǵy oıynshyqtar men oryndyqtardy, gúlderin laqtyryp, órt sóndirýge arnalǵan qurylǵydan shashqan. Esikterdiń áınegin syndyrǵan 6 jasóspirimniń zańdy ókilderiniń kinási ákimshilik quqyq buzýshylyq týraly hattamamen, baıanatpen, saýalnama hattamalarymen, kýálardyń aıǵaqtarymen jáne istiń basqa materıaldarymen tolyq dáleldendi», - dep málim etti atalǵan sottyń baspasóz qyzmetinen.
Jasóspirimderdiń zańdy ókilderi balalarynyń jasaǵan áreketine ókinip, az mólsherde aıyppul taǵaıyndaýdy suraǵan.
«Sot jasalǵan ákimshilik quqyq buzýshylyqtyń sıpatyn, jasóspirimderdiń zańdy ókilderine 441 teńge mólsherinde aıyppul túrindegi ákimshilik jazasyn qoldandy. Bul taǵaıyndalǵan aıyppul somasynyń 30% quraıdy», - dep málim etti sottyń baspasóz qyzmetinen.
Sot qaýlylary zańdy kúshine engen joq.
Eske salaıyq, budan buryn Atyraý oblysynda 9 jasóspirim balabaqshaǵa kirip astań-kesteńin shyǵarǵanyn habarlaǵan edik.
Keıin balabaqsha múlkin talqandaǵan jasóspirimder kamera arqyly anyqtaldy.