Atyraý oblysynda ákim saılaýyn 125 baıqaýshy baqylaýda
Oblystyq aýmaqtyq saılaý komıssııasynyń tóraǵasy Azamat Aımanakýmovtyń málimetine súıensek, 18 aýyldyq okrýg ákiminiń saılaýy 36 saılaý ýchaskesinde ótip jatyr.
«Ár saılaý ýchaskesinde sanıtarııalyq talaptar qatań saqtalýda. Saılaý úderisin baıqaýshylar qadaǵalap otyr. Qazir 18 saılaý okrýgindegi saılaý ýchaskelerinde 125 baıqaýshy tirkeldi. Onyń ishinde úmitkerlerdiń senim bildirgen 34 adamy bar. Al, saıası partııalar 27 baıqaýshy jiberdi. Sondaı-aq, qoǵamdyq birlestikter men kommertsııalyq emes uıymdardyń 43 ókili saılaýdyń talapqa saı ótýine úles qosýda. Óńirdegi BAQ-tyń 21 ókili baıqaýshy retinde tirkelgen» -deıdi Azamat Aımanakýmov.
Eske sala ketelik, buǵan deıin Atyraý oblysynda 36 saılaý ýchaskesinde daýys berilip jatqanyn, saılaýshylar belsendiligi baıqalatynyn habarlaǵan edik.
