Atyraý oblysynda 994 otbasyǵa ataýly áleýmettik kómek taǵaıyndaldy
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń deregine súıensek, ataýly áleýmettik kómek 1 tamyzdan bastap berilip jatyr.
«Az qamtylǵan otbasylardy áleýmettik qorǵaý maqsatynda óńirdegi 994 otbasyndaǵy 5 555 adamǵa 258 mln teńge ataýly áleýmettik kómek taǵaıyndaldy. Onyń ishinde 775 otbasynyń 4 576 múshesine shartty aqshalaı kómek, 247 otbasyndaǵy 1 142 adamǵa shartsyz aqshalaı kómek berildi. Máselen, shartty aqshalaı kómek quramynda eńbekke qabiletti keminde bir múshesi bar otbasylarǵa arnalyp otyr. Muny áleýmettik kelisimshart jasalǵan jáne adal oryndaǵan jaǵdaıda kórsetiledi. Al, shartsyz aqshalaı kómek eńbekke jaramsyz adamy bar otbasylarǵa nemese otbasynyń eńbekke jaramdy jalǵyz múshesi obektıvti sebeptermen jumysqa ornalasýǵa múmkindigi joq jaǵdaıda beriledi», - deıdi Azamat Mámbetov.
Onyń aıtýynsha, ataýly áleýmettik kómek alýshylardyń sanatyna taldaý jasalǵan. Soǵan sáıkes, 18 jasqa deıingi balalar – 66,4%, jumyssyzdar – 3,2%, kómekke júginý kezinde jumysy barlar –12,9%, táýelsiz qyzmetkerler – 0,7%, zeınetkerler – 0,7%, barlyq toptaǵy múgedekter – 0,9%, stýdentter – 3,6%, bala kútimimen otyrǵandar – 10,7%, basqa sanatqa kiretinder 0,9% quraǵan.
«Ataýly áleýmettik kómektiń shartty aqshalaı kómek túrin alýshylardyń ishinde eńbekke qabiletti sany – 1 326 adam. Onyń ishinde 38-i táýelsiz qyzmetkerler, 720-y júginý kezinde jumysy barlar, 180-i jumyspen qamtý ortalyǵynda jumyssyz retinde tirkelgender, 388-i bala kútiminde otyrǵandar», -dep málim etti Azamat Mámbetov.
Sondaı-aq, ataýly áleýmettik kómek alatyn otbasylar qatarynda 1 jastan 6 jasqa deıingi 1 310 bala bar. Olarǵa 56 mln 600 myń teńgege kepildendirilgen áleýmettik toptama berilgen.
Eske sala ketelik, buǵan deıin Atyraý oblysynda jarty jylda 25,3 mlrd teńge ıgerilmeı qalǵanyn habarlaǵan edik.
