Atyraý oblysynda 173 jasóspirim erte júktilik esebine alynǵan

ATYRAÝ. QazAqparat – Atyraý oblysynda byltyr 173 jasóspirim qyz erte júktilik esebine alynǵan, dep habarlaıdy QazAqparat tilshisi.

Oblystyq densaýlyq saqtaý basqarmasy baspasóz qyzmetiniń málimetinshe, erte júktilik esebindegi jasóspirimder Atyraý qalasy men Jylyoı, Maqat aýdandarynda baıqalyp otyr.

«Atyraý oblysynda byltyr erte júktilik esebine 173 jasóspirim qyz alyndy. Atyraý qalasyndaǵy №3 jáne №4 emhanalarda, «Aqtóbe Tranzıt Ekspedıshn» jeke klınıkasynda erte júktilikpen 102 jasóspirim tirkeldi. Al, Jylyoı men Maqat aýdanynda erte júktilik esebine 71 jasóspirim qyz alynǵany anyqtaldy», - dep habarlady basqarmanyń baspasóz qyzmeti.

Ótken jyly kámelet jasyna tolmaǵan 85 jasóspirim bosanǵan. Onyń bireýi 14 jasta bolǵan. Al, 23 jasóspirim 16 jasynda jáne 17 jasar 61 qyz ómirge bala ákelgen.

«Aldyńǵy jyly kámeletke tolmaǵan 108 qyz bosanǵany tirkelgen edi. Al, byltyr olardyń sany 85 boldy. Buǵan erte júktiliktiń aldyn alý baǵytyndaǵy profılaktıkalyq túsindirý jumysynyń septigi tıdi», - dep málim etti basqarmanyń baspasóz qyzmetinen.

Erte júktiliktiń aldyn alý maqsatynda Atyraýdaǵy №3 qalalyq emhanada jasóspirimder gınekologiniń kabıneti ashylǵan. Ótken jyly oǵan 18 jasqa tolmaǵan 1 014 qyz júgingen. Onyń ishinde 364 jasóspirim densaýlyqqa qatysty shaǵym aıtqan. Al, 483 jasóspirim profılaktıkalyq tekserýden ótken.

Eske sala ketelik, budan buryn Atyraý oblysynda 300-ge jýyq medıtsına qyzmetkeri jetispeıtinin habarlaǵan edik.