Atyraý oblysynda 100 mln teńgeniń kabeli men elektr baǵanalaryn urlaǵan top ustaldy

Atyraý polıtseıleri 100 mln teńgeniń kabeli men elektr baǵanalaryn urlaǵan topty ustady. Kúdiktilerge qatysty 16 epızod boıynsha tergeý bastaldy, dep habarlaıdy QazAqparat tilshisi.

Oblystyq polıtsııa departamenti baspasóz qyzmetiniń málimetinshe, kúdiktiler 8 qyrkúıekte ustalǵan.

«Krımınaldyq polıtsııa basqarmasynyń qyzmetkerleri Jylyoı aýdanynyń aýmaǵynda baǵanaǵa ilingen elektr kabelderin jymqyryp júrgen tórt kúdiktini ustady. Kúdiktilerdiń jasy – 26, 25 jáne 24-te. Bári de osy aýdanda turady. Biriniń «Gazel» avtokóliginen 7-8 qyrkúıek aralyǵynda urlanǵan shamamen 4 shaqyrymdyq joǵary voltty elektr kabeli tárkilendi. Olar urlaǵan kabeldi Aqtóbe qalasynda ornalasqan temir-metall qabyldaý ortalyǵyna tapsyrǵan. Urlyqtan Jylyoı aýdany aýmaǵynda elektr baǵanalaryn ornatyp jatqan kompanııalarǵa 100 mln teńgeden astam shyǵyn keltirilgen. Qazir kúdiktilerge qatysty 16 epızod boıynsha qylmystyq isti tergeý bastaldy. Kúdiktilerge «kúzetpen ustaý» túrindegi bultartpaý sharasy qoldanyldy», - dep habarlady departamenttiń baspasóz qyzmeti.

Atalǵan derek boıynsha QR Qylmystyq kodeksiniń 188-baby 3-bóligimen sotqa deıingi tergep-tekserý júrip jatyr. Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.

Eske sala ketelik, budan buryn Atyraýǵa jumysqa turýǵa kelgen BQO turǵynynan 1,5 myń doza esirtki tárkilengenin jazǵan bolatynbyz.

Sondaı-aq, esirtki saqtaǵan boıjetken qamaýǵa alynǵanyn habarlaǵan edik.