Atyraý munaı zaýytynda jaraqat alǵan qurylysshy aýrýhanada kóz jumdy
Bul derekti Atyraý munaı óńdeý zaýytynyń qoǵammen baılanys bólimi rastady.
«Atyraý munaı óńdeý zaýyty 3 naýryzda kásiporyn aýmaǵynda qurylys jumystaryn júrgizip jatqan qosalqy merdiger kompanııalardyń birinde jazataıym oqıǵa bolǵanyn habarlaıdy. Oqıǵa mehanıkalyq tazartý qondyrǵylarynyń qurylys alańynda júk kótergish tehnıkany manevrleý kezinde bolǵan. Qosalqy merdiger kompanııanyń zardap shekken jumysshysy oblystyq aýrýhananyń travmatologııa bólimshesine jedel jetkizildi. Keıin jumysshy alǵan jaraqaty saldarynan aýrýhanada kóz jumdy», - dep habarlady zaýyttyń qoǵammen baılanys bóliminen.
Qazir bolǵan oqıǵanyń mán-jaıy men sebebi anyqtalyp jatyr.
Eske sala ketelik, budan buryn Atyraý munaı óńdeý zaýytyna bir jylda 100 mln teńgeniń aıyppuly salynǵanyn habarlaǵan bolatynbyz.
Oblystyq ekologııa departamenti baspasóz qyzmetiniń málimetinshe, byltyrǵy 9 aıda Atyraý munaı óńdeý zaýytyna 4 ret jospardan tys tekserý, 1 profılaktıkalyq baqylaý júrgizilgen.
«Bıologııalyq tazartý qondyrǵysynan quramynda úlken kontsentratsııada bıoshlamy bar sarqyndy óndiristik sý aǵyzǵany úshin 31 mln 233 myń teńge aıyppul salyndy. Qorshaǵan ortaǵa emıssııalardyń normatıvterin asyrýǵa qatysty 4 zań buzýshylyq anyqtalyp, salynǵan aıyppuldyń kólemi 55 mln 949 teńgeni qurady. Ótken jyly Atyraý munaı óńdeý zaýytyna ekologııalyq zańdylyqtyń talaptaryn buzǵany úshin 100 mln 672 myń teńge ákimshilik aıyppul salyndy», - dep habarlaǵan bolatyn departamenttiń baspasóz qyzmetinen.