Atyraý munaı óńdeý zaýytynda janar-jaǵarmaı ónimderin shyǵarý jumystary qaıta jandandy
«Atyraý MÓZ» JShS-niń qoǵammen baılanys bóliminen málim etkendeı, zaýyt keshe, 6 shildede jumys isteı bastaǵan. Zaýytta baıaý koksteý qondyrǵysynan basqa jeliler shtattyq rejımde jumys istep tur.
«Baıaý koksteý qondyrǵysynda apatty toqtaý saldarynan bitelip qalǵan jabdyqty tazalaý jumystary júrgizilip jatyr. Bul qondyrǵy shıki koks óndirýge arnalǵan. Munaı óńdeý jáne munaı ónimderin shyǵarý kólemine áser etpeıdi. Atalǵan qondyrǵyny iske qosý 9 shildege josparlanyp otyr», -dep habarlady kásiporynnyń qoǵammen baılanys bóliminen.
Qazir Atyraý munaı óńdeý zaýytynyń rezervýarlaryndaǵy qor esebinen áleýmettik mańyzy bar munaı ónimderin jóneltý jalǵasyp jatyr. Máselen, 1-6 shilde aralyǵynda tutynýshylarǵa 24 myń tonna AI-92 benzınin, 9 myń tonna AI-95 janarmaıyn, 40 myń tonna dızel otynyn, 3 myń tonna áýe otynyn jóneltken.
Eske sala ketelik, budan buryn elektr qýatynyń joqtyǵynan Atyraý munaı óńdeý zaýyty jumysyn toqtatqanyn habarlaǵan edik.
Atyraý munaı óńdeý zaýyty 3 shilde kúni jergilikti ýaqytpen saǵat 17:25-te jumysyn toqtatty. Oǵan «KEGOC» AQ tarapynan elektr energııasynyń óshirilýi sebep bolǵan.
Keıin zaýyt qondyrǵylary iske qosylyp jatqanyn jazǵan bolatynbyz.
Sondaı-aq, Atyraý munaı óńdeý zaýyty 6 shildede tolyq iske qosylatyny aıtyldy.
Al, ekologtar Atyraý munaı óńdeý zaýytyna jospardan tys tekserý júrgizýdi josparlap otyr.
