Atyraý munaı óńdeý zaýytyna jospardan tys tekserý júrgiziledi
Oblystyq Ekologııa departamenti baspasóz qyzmetiniń málimetinshe, aýa sapasyn baqylaıtyn 34 stansa bar. Onyń ishinde «Qazgıdromet» AQ óńirlik fılıalynyń balansyna 11 stansa alynǵan.
Al 4 stansa Atyraý munaı óńdeý zaýytyna tıesili bolsa, 19 stansaǵa NCOC kompanııasy ıelik etedi.
«Bıylǵy 3 shildede elektrmen jabdyqtaýdyń isten shyǵýyna baılanysty gaz alaýy jaǵyldy. «Qazgıdromet» RMK derekterine sáıkes sol kúni aýa sapasyn baqylaıtyn eki stansada kúkirsýtek quramynyń shekti normadan asý deregi tirkelip otyr. Keshki saǵat 19:00-de «Jılgorodok» stansasynda aýadaǵy kúkirtsýtek quramynyń shekti ruqsat etilgen kontsentratsııasy 1,6-ǵa, al «Prıvokzalnyı» stansasynda bul norma 1,4-ke artqany tirkeldi. Oblystyq Ekologııa departamenti kásiporynǵa jospardan tys tekserý júrgizýdi josparlap otyr», - dep habarlady Ekologııalyq retteý jáne baqylaý komıetiniń baspasóz qyzmeti.
Kásiporynnyń sanıtarlyq qorǵaý aımaǵynda lastaýshy zattardyń shamadan asýy tirkelmegen.
Eske sala ketelik, budan buryn elektr qýatynyń joqtyǵynan Atyraý munaı óńdeý zaýyty jumysyn toqtatqanyn habarlaǵan edik.
Zaýyttyń qoǵammen baılanys bóliminiń málimetinshe, elektr jelisindegi aqaýdyń saldarynan qondyrǵylardyń jumysy apattyq jaǵdaıda toqtatylǵan.
«Atyraý munaı óńdeý zaýyty 3 shilde kúni jergilikti ýaqytpen saǵat 17:25-te jumysyn toqtatty. Buǵan «KEGOC» AQ tarapynan elektr energııasynyń óshirilýi sebep boldy», -dep málim etti qoǵammen baılanys bóliminen.
Keıin Atyraý munaı óńdeý zaýytynyń qondyrǵylary iske qosylyp jatqanyn jazǵan bolatynbyz. Sondaı-aq Atyraý munaı óńdeý zaýyty 6 shildede tolyq iske qosylatynyn habarladyq.
