Atyraý dárigerleri naýqasqa kúrdeli ota jasap, 15 keli isikti alyp tastady
Atyraý oblystyq Onkologııa dıspanserinde qaterli isikke shaldyqqan naýqasqa kúrdeli ota jasaldy. Dárigerler otaǵa deıin naýqasqa retroperıtoneým sarkomasy dıagnozyn qoıǵan.
«Onkologııa dıspanserindegi kúrdeli otany jasaǵan hırýrgııa bóliminiń meńgerýshisi Maqsat Shámshenov pen oblystyq Kardıoortalyqtyń qan tamyrlar hırýrgi Erlan Mádeshev jasady. Hırýrgterge assıstentter Mereı Qazǵalıev pen Maqsat Týǵanbaev, Meıramgúl Igibaeva, anestezıolog Alıakbar Imamatdınov kómektesti», - dep habarlady dıspanserden.
Naýqasqa jasalǵan kúrdeli ota ortańǵy laparotomııa dep atalady. Hırýrgter anastomozdardy qoıý arqyly naýqastyń denesinen birneshe isikti alyp tastaǵan. Onyń ishinde syrtqy myqyn arterııasy men sol jaqtaǵy nesepaǵardyń tómengi úshten bir bóligin rezektsııalaý arqyly alynǵan úlken retroperıtonealdy isikter bar. Eń úlken isiktiń salmaǵy – 15 keli.
Eske sala ketelik, buǵan deıin Atyraýda 53 jastaǵy áıeldiń jatyrynan 8 keli mıoma alynǵanyn jazǵan bolatynbyz.
Ota oblystyq aýrýhanada jasaldy. Gınekologııa bólimshesiniń meńgerýshisi Janargúl Bekenovanyń aıtýynsha, 53 jastaǵy áıelge «Jatyrdyń alyp mıomasy. Túıin nekrozy, ortasha anemııa» dıagnozy qoıylǵan.
«Aýrýhanaǵa kelgende naýqas ishki aǵzasy aýyryp turǵanyn aıtty. Júregi aınyp, qusqan. Aǵzasynda álsizdik, bas aınalýy baıqalǵan. Jynys jolynan qan ketken. Osyndaı shaǵymǵa baılanysty naýqasty tolyq tekserýden ótkizdik. Tekserýdiń qorytyndysymen naýqastyń jatyryna ota jasalyp, salmaǵy 8 keli mıomany alynyp tastaldy», - deıdi Janargúl Bekenova.