«Attyń jalynda» degen ataýmen óner kórmesi ótti
ASTANA. KAZINFORM — Kórmege qazaqstandyq jáne sheteldik ónerpazdardyń týyndylary qoıyldy. Otandasymyz, fotograf Nıkıta Basov kókpar oıynyna qatysty túsirgen 78 sýretin nazarǵa usyndy.
— Kókpar — álemde eki-aq elde kórýge bolatyn erekshe sport. Ony shetelderden kóptegen týrıst tartatyn qundylyqqa aınaldyrýǵa bolar edi. Jahandy ulttyq muramyzben ǵana tańǵaldyra alamyz. Jalpy, men ulttyq oıyndarymyzdy, jylqyny qatty jaqsy kóremin. Búgingi kórmege kókparda túsirilgen sýretterimdi qoıdyq. Bolashaqta ózge de ulttyq oıyndarymyz jóninde kórme uıymdastyrǵym keledi, — dedi Nıkıta Basov.
Sondaı-aq astanalyqtar reseılik sáýletshi ári músinshi Igor Rogovskıı jasaǵan jylqynyń eki músinin de tamashalady.
— Músinder tabıǵı materıaldan jasalǵan. Ósimdikterdiń tamyrlary ózen betinde uzaq ýaqyt qalqyp júredi. Men olardy terip, jınap, sheberhanama ákelemin de, músinder qurastyramyn. Nege bul materıaldy tańdaıtynymdy túsindireıin. Birinshiden, ósimdik tamyrlary sýda uzaq qalqyp júretindikten, sý olardyń názik talshyqtaryn shaıyp, tek berik bóligi qalady. Ekinshiden, olar ıilgish keledi. Ár tamyrdy kespeı, syndyrmaı-aq, músinge jabystyratyn oryn tabý jeńil, — dedi Igor Rogovskıı.
Aıta keteıik buǵan deıin Astanada fototilshi Nurmuhammat Imamovtyń kórmesi ashylǵanyn jazǵanbyz.