Atom stansasyn salý máselesin keıinge shegere berýdiń qajeti shamaly - N. Ábiqaev
Eń bastysy, ornalasatyn jeri men qaýipsizdigine qatysty sharalardy túpkilikti tereń talqylaý kerek. Bul týraly búgin elordada ótip jatqan IV Astanalyq Ekonomıkalyq forýmy barysyndaǵy 2012 jylǵy «RIO+20» turaqty damý jónindegi búkilálimdik sammıt úshin jahandyq energııa-ekologııalyq strategııany qurý jónindegi paneldik sessııa boıynsha baspasóz máslıhaty barysynda Qazaqstan Jaratylystaný ǵylymdary ulttyq akademııasynyń prezıdenti Nurtaı Ábiqaev osylaı málim etti.
«Qazaqstanda Atom stansasyn salý týraly másele kóterilgenine biraz jyldyń júzi boldy. Bir kezderi depýatttyq korpýstyń qarsylyǵyna oraı, másele keıinge shegerilgen edi. Odan keıin jaqyndaǵy Japonııa qasiretine deıin de bizdiń naqty josparlarymyz bolǵan. Degenmen, meniń oıymsha, buny keıinge ysyrýdyń nemese shegindire berýdiń esh qajettiligi joq», - dedi N. Ábiqaev.
Onyń aıtýynsha, Atom elektr stansasyna qatysty basty másele - ony qaıda salý jáne ondaǵy qaýipsizdiktiń joǵary deńgeıin qalaı qamtamasyz etýge qatysty bolyp otyr. «Máselen, buǵan deıin Aqtaýǵa salamyz dep keldik. Keıin ol óńirge durysy munaı men gaz negizinde salý kerektigi aıqyndaldy. Al eń alǵashqy tańdalǵan óńir Balqashtyń mańy edi. Jalpy, bundaǵy másele týraly aıtatyn bolsam, men atom energııasynan bas tartýǵa bolmaıdy dep sanaımyn. Negizgisi osy boıynsha jan-jaqty talqylaýlar bolyp, jobanyń ornalasatyn jerine, onyń qaýipsizdigine kóbirek alańdaý kerek», - dedi N. Ábiqaev.
