«Atom stansasy qashan salynady?» - baspasózge sholý
***
«Egemen Qazaqstan» basylymynyń búgingi sanynda «Ánniń de estisi bar, eseri bar» atty maqalada halyq ánderiniń búgingi ánshilermen retsiz ózgeristerge ushyraýyna qatysty ózekti taqyryp kóterilgen.
«Halyq óleńi. Halyq áni. Sózi men áni, máni men sáni jarasqan. Sondyqtan birde-bir jolyn alyp tastaýǵa nemese sózin ózgertýge bolmaıdy. Óıtkeni, barlyǵy óziniń ornynda. Ǵasyrlar boıy elenip-ekshelip, suryptalyp, osy kúnge aman-esen jetken halyq sózin burmalaý - qııanat. Qazirgi ánshilerimizdiń án sózderin ózgertip aıtyp júrgenin estigende janyńdy qoıarǵa jer tappaısyń», - dep qynjyla jazady maqala avtory.
«Belgili ánshimiz Muhtar Shahanov sózin jazǵan «Aq bantık» ánindegi «Bilmeımin, boıjetip qaldyń ba?» - degen joldy «Bilmeımin, erjetip qaldyń ba?» - dep burmalap aıtqanyn da estidik. Qyz boıjetedi. Ul erjetedi. Ekeýin shatastyrýǵa bola ma?», - delingen materıalda.
«Egemen Qazaqstan» basylymynda Eýropadaǵy jumyssyzdyq pen daǵdarystyń beleń alyp bara jatqandyǵy sóz boldy. «Qazirgi tańda beleń alǵan jumyssyzdyqtyń «judyryǵynan» ózgelerge qaraǵanda Eýropa memleketteri kóbirek japa shegip jatyr. Ótken jyly munda buryn-sońdy bolmaǵan kórsetkishter tirkeldi. Dáliregi, orta eseppen alǵanda, jumyssyzdyq deńgeıi 12 paıyzǵa ósti. Bul - ekonomıkasy damyǵan, ozyq tehnologııamen qamtylǵan memleketter úshin aýyr soqqy», - delinedi «Jahandy jaılaǵan jumyssyzdyq» atty maqalada.
«Alaıda, olar qol qýsyryp qarap otyrǵan joq. Jaǵaǵa jarmasyp, etekke oralǵan osy qıyndyqty jeńý úshin qolynan kelgenniń barlyǵyn jasap baǵýda. Salany saýyqtyrý maqsatynda jumsalǵan qarjyda, beınelep aıtsaq, esep joq. Biraq, ábden meńdep alǵan «keseldiń» beti qaıtar emes. Búgingi Eýropada bes-alty adam jumys isteıtin shaǵyn tseh jumysyn toqtatsa, ol tragedııa retinde qabyldanatyn jaǵdaıǵa jetkendeı. Budan biz qara jumystyń qamytyn áldeqashan tehnıkanyń moınyna ilip, talaıǵa keýdemsoqtyqpen qaraýǵa daǵdylanyp alǵan eýropalyqtardyń júıkesi syr bere bastaǵanyn ári aldyn kese-kóldeneńdegen kedergilerden attap ótýde qaýqarsyzdyq tanytyp otyrǵanyn ańǵaramyz», - dep jazady «Egemen Qazaqstan».
***
El Parlamentinde «atom elektr stansasyn» salý máselelerin zańdastyratyn jobanyń tusaýy kesildi, dep jazady «Aıqyn» basylymy «Atom stansasy qashan salynady?» dep atalatyn maqalada.
Energetıka mınıstriniń orynbasary Baqytjan Jaqsalıev moıyndaǵanyndaı, AES-tiń qaı jerde salynatyndyǵyna qatysty sońǵy sheshim áli qabyldanbapty.
«Birden aıtaıyn, bul tek jospar ǵana. Sheshim tek halyqpen keń talqylaýdan keıin ǵana qabyldanady. Bizde eki alań belgilenip otyr. Onyń biri - Balqash kóliniń aýdany, «Shyǵanaq» temir jol stansasy men «Úlken» kenti arasy, ekinshisi - Semeı synaq polıgony, Kýrchatov qalasy mańy» dep habarlady ol depýtattarǵa.
«Keıbir sarapshylardyń aıtýynsha, «Qazaqstannyń AES-ti Kýrchatovta salǵanyn Reseı qalap otyr: onyń elektr qýatyn satyp alyp, ózine tasymaldaý jaqynyraq bolatyn» kórinedi. Al Balqashqa, eń aldymen sol ındýstrııalyq órkendeýshi óńirdegi artyp kele jatqan qýatqa qajettilikti qanaǵattandyrý maqsatynda tańdaý túsýi múmkin. Jýrnalıster osy baılamdardyń durys-burystyǵyn vıtse-mınıstrden suraǵan. Bul onyń ashýyn týǵyzdy: «Bul suraqta taqyrypqa múldem qatysy joq baılamdar tym kóp. Mundaı dáıektemeler eshqashan aldan tartylǵan emes. Men jýrnalısterdi aqparatty shynaıy usynýǵa úndeımin! Sizderdiń shyndyq emes aqparattaryńyz qate túsinýlerge soqtyrady», -dedi B.Jaqsalıev jýrnalısterge, dep onyń sózi keltirilgen maqalada.
«Aıqyn» gazetiniń kezekti bir maqalasynda telearnalar men radıolar til týraly zańnyń saqtamaı otyrǵandyǵy jazylǵan.
"Arzanqol, kóshirme baǵdarlamamen efır toltyrýǵa kóshken arnalar tildik normany saqtaýda da zańbuzýshylyqqa jol berip otyr. Osyǵan oraı, elektrondy aqparat quraldary tarapynan arnaıy monıtorıng júrgizilgen. Monıtorıng barysynda, zańbuzýshylyq faktileri anyqtalǵanyn aıtady vıtse-premer Berdibek Saparbaev. Búgingi kúnge deıin keıbir teleradıo kompanııalary zańdy belshesinen basyp kelgen. Zańda kórsetilgen talaptardy oryndamaǵan. Tilder týraly zań ne dep edi? «Memlekettik tildegi tele-radıo baǵdarlamalar basqa tilderdegi tele-radıo baǵdarlamalarynyń jıyntyq kóleminen kem bolmaýy tıis», delingen. Alaıda Úkimet qazaqtildi baǵdarlamanyń kórsetilimi elý paıyzǵa jetpegenin anyqtap otyr", - delingen «Telearnalar talapty nege saqtamaı otyr?» atty maqalada.
Memlekettik tildegi baǵdarlamalar sanynyń elý paıyzdan kem bolmaý qajettigi buǵan deıin de talaı minbelerde aıtylǵan. Tipti zańdyq talapty oryndap júrgen arnalar da barshylyq.
«Alaıda ol talaptar tildik normaǵa saı kele me? «Qazaq tilinde kórsetilip júrgen» habarlardyń deni - kontsertter men ázil-syqaq teatrlarynyń baǵdarlamalary ekeni daýsyz. Máselen, 31-arna «Shanshar», «Aldaraspan», «Nysana» teatrlarynyń shoý-kontsertterin qaıtalap kórsetýden áste jalyqqan emes. Kerisinshe, sol shoý-baǵdarlamalardy kórýden kórermen jalyqty. Tipti kórse kóz uıalatyn jaǵdaıǵa jettik. Odan qala berdi, telearnalar elý paıyzdy úndi serıaldarynyń shalaǵaı aýdarmasymen toltyrýǵa qumar bolyp aldy. Efırdi shala saýatty «juldyzdarmen» toltyrý da reıtıng jınaýdyń basty quralyna aınalǵan», - deıdi maqala avtory.
***
Almaty oblysynda shetelge qyz saýdalaǵan bir top áıel qylmyskerler ustaldy, dep habarlaıdy resmı tildi «Ekspress K» basylymy. Úsh áıeldiń ekeýi qolǵa tústi.
"Úmitkerlerdi tańdaý barysyna monsha men haýyzdardyń ákimshilik qyzmetkeri kirisetin bolǵan. Árbir "túngi kóbelek" úshin olar 300-400 dollar alyp otyrdy. Saýdagerler negizinen aqquba jáne eýropalyq násildi qyzdarǵa basymdyq beretin kórinedi. Oblystyq IID-niń habarlaýynsha, sýtenerlerdi qolǵa túsirý operatsııasy birneshe aı daıyndalǵan", - delingen «Eskadron geter letýchıh» atty maqalada.
