Atom energetıkasyn paıdalaný salasynda qaýipsizdik deńgeıi arta túsetin bolady
Zań jobasy ıadrolyq, radıatsııalyq jáne elektrofızıkalyq qondyrǵylardy ornalastyrý, salý, paıdalaný jáne paıdalanýdan shyǵarý kezinde qaýipsizdiktiń qaǵıdattary men negizgi talaptaryn belgileýge baǵyttalǵan.
Qujattyń maqsaty halyq qaýipsizdiginiń jáne halyq densaýlyǵyn tıimdi qorǵaýdyń tıisti deńgeıin, atom energııasyn paıdalaný kezinde ıadrolyq qarýdy taratpaý rejımin qamtamasyz etý jáne atom energııasyn paıdalaný kezinde týyndaıtyn qatynastardy retteý bolyp tabylady. Bul rette, qujat atom energııasy salasyn retteýdegi atom energııasyn paıdalanatyn mekemelerge qaýipsizdik deńgeıiniń talaptaryn oryndaýǵa, olardy júzege asyrýǵa ketetin shyǵyndardy azaıtýǵa múmkindik beredi. Sonymen qatar, zań jobasy qorshaǵan ortany qorǵaýdy kózdeıdi, ıaǵnı, memlekettik organdar men uıymdardyń jaýapkershilik ýákilettiligin naqtylaý arqyly qorshaǵan ortany qorǵaýdyń tıimdi joldary anyqtalady.
Energetıka mınıstri Vladımır Shkolnıktiń aıtýynsha, qoldanystaǵy «Atom energııasyn paıdalaný týraly» zań budan 15 jyl buryn, sol kezeńdegi elimizdiń atomdyq tájirıbeleri, ıadrolyq tehnologııalardy qoldaný deńgeıi men atom ónerkásibi jaǵdaılary esepke alyna otyryp, qabyldanǵan bolatyn.
«Qazirgi ýaqytta Qazaqstanda medıtsınada, ónerkásip pen ǵylymda qoldanylatyn 5 ıadrolyq qondyrǵy, 4 radıoaktıvtik qaldyqtar qoımalary, júzdegen radıatsııalyq qondyrǵylar, birneshe myń sáýleler ıondaıtyn oryndar bar. Osy jyldar aralyǵynda, Qazaqstanda atom energııasyn paıdalaný jumystaryn júrgizýge 3 myńnan astam lıtsenzııalar berilgen. Atom energııasyn paıdalaný salasynda qyzmetterin júzege asyratyn uıymdar men kásipkerlik sýbektiler sany da artyp keledi. Sonymen qatar, Qazaqstan osy ýaqyt aralyǵynda atom energııasyn paıdalaný salasyndaǵy birqatar halyqaralyq konventsııalarǵa da qosyldy», - deıdi V. Shkolnık.
Onyń aıtýynsha, jańa redaktsııadaǵy zań jobasyn ázirleý de osy máselelerge baılanysty týyndap otyr.
Zań jobasy boıynsha qaýipsizdik talaptarynyń arajigin ajyratý maqsatynda qondyrǵylar men ıondandyrýshy sáýlelený kózderiniń radıatsııalyq qaýiptilik sanattary belgilenedi. Qujatty qabyldaý arqyly qaýipsiztikti qamtamasyz etýge qoıylatyn talaptar aıqyndalyp, atom energııasyn paıdalaný salasyndaǵy qyzmetti retteý bóligindegi olqylyqtar joıylatyn bolady. Osy arqyly atom energetıkasy salasyndaǵy qyzmetterdiń qaýipsizdigi arta túsedi.