Atom elektr stantsııasyn salý tehnologııasy 2023 jyly tańdalady

ASTANA. QazAqparat – 2023 jyly elimizde atom elektr stantsııasyn salý tehnologııasy tańdalady. Energetıka mınıstri Bolat Aqsholaqov bul rette 4 eldiń tehnologııasy qarastyrylatynyn málim etti, dep habarlaıdy QazAqparat tilshisi.

«2009 jyldan bastap Qazaqstan tabıǵı ýran kólemi boıynsha álemde birinshi orynda. Bıylǵy jyldyń qorytyndysy boıynsha ýran óndirý 21,6 myń tonna kóleminde degen boljam bar. Osy jyly jeltoqsanda Qytaıǵa jylý bóletin jınaqtardyń birinshi partııasy jetkizildi. Atom elektr stantsııasyn salýdyń ońtaıly orny retinde Almaty oblysynyń Jambyl aýdany usynyldy», - dedi Bolat Aqsholaqov ortalyq kommýnıkatsııalar qyzmeti alańynda ótken baspasóz máslıhatynda.

Mınıstrdiń aıtýynsha, AES salý boıynsha CNNC (Qytaı), Rosatom (Reseı), KHNP (Koreıa), EDF (Frantsııa) jetkizýshileriniń reaktorlyq tehnologııalarynyń tizimi jasaldy.

«2023 jyly atalǵan tehnologııalardyń biri tańdalady. Tizimde 4 el QHR, Ońtústik Koreıa, Frantsııa jáne Reseı Federatsııasy bar. Sonyń arasynan tańdaý jasaımyz. Odan bólek, Qazaqstannyń ıadrolyq ınfraqurylymyna keshendi sholý jasaýda atom energııasy jónindegi halyqaralyq agenttiktiń mıssııasyn uıymdastyrý josparlanyp otyr», - deıdi ol.

Eske salaıyq, energetıka mınıstri bıyl maýsymda atom elektr stantsııasy salynatyn jerde zertteý jumystary bastalǵanyn habarlaǵan edi. https://kaz.inform.kz/news/atom-elektr-stanciyasy-salynatyn-zherde-zertteu-zhumystary-bastaldy_a3943384

Foto: storage.googleapis.com