Atyraýlyq jigit 20 mýzykalyq aspapta oınaıdy
ATYRAÝ. KAZINFORM – Atyraýlyq ónerpaz Abzal Sıǵýatollauly 20 mýzykalyq aspapta oınaıdy. Qazir «Sarmad» etno-folklorlyq ansamblinde jumys isteıdi.
Ónerli jigit Qyzylqoǵa aýdanynyń Jasqaırat aýylynda ómirge kelgen. Osyndaǵy mektep, klýb sahnasynda án aıtyp, dombyra shertken ulynyń ónerin ushtaýdy kózdegen. Sóıtip, Atyraý qalasyna qonys aýdarǵan.
«Bala kezimde mýzykalyq aspaptarda oınaýǵa qyzyqqan edim. Ákem meniń ónerli bolǵanymdy qalap, yntamdy oıatty. Ákemniń keńesimen Atyraý qalasyndaǵy N.Tilendıev atyndaǵy daryndy balalarǵa arnalǵan akademııada vokal, pıanıno synybynda oqydym. Joǵary bilimdi H.Dosmuhamedov atyndaǵy Atyraý memlekettik ýnıversıtetiniń óner fakýltetinen alyp shyqtym. Keıin bilimimdi jetildirýdi kózdep, Qurmanǵazy atyndaǵy qazaq ulttyq konservatorııasynda akademııalyq utqyrlyq baǵdarlamasymen oqýymdy jalǵastyrdym», - deıdi Abzal Sıǵýatollauly.
Óziniń aıtýynsha, stýdenttik kezeńin tekke ótkizbeı, mýzykalyq aspaptarda oınaýǵa den qoıǵan. Ár aspaptyń tarıhyn, jasalý jolyn jetik biledi. Qazir jıyrma túrli aspapta erkin oınaıdy. Qazaqtyń ulttyq murasy – dombyranyń qos isheginen kúmbirlete kúı tógedi. Qylqobyzben Qorqyt dáýirinen jetken uly dala sazyn syzyltady. Syrnaımen syrly áýenderdi áýeletedi. Pıanınomen klassıkalyq mýzykalardy naqyshyna keltire oryndaıdy. Gıtara, baıan, jetigen sekildi aspaptarda oınaýdy meńgerip alǵan.
«Alǵashqyda dombyra tartýdy úırengen edim. Biraq tek bir aspappen shektelgim kelmedi. Óner jolyn tańdaǵan soń birneshe aspapta oınaǵandy jón kórdim. Sol maqsatyma jaqyndap kelemin. Óıtkeni áli de birneshe aspapta oınaýdy kózdep júrmin», - deıdi Abzal Sıǵýatollauly.
Túrli aspapty qolynan alsa, on saýsaǵynan saz tógiletin ónerli jigit D.Nurpeıisova atyndaǵy akademııalyq qazaq halyq aspaptary orkestri janyndaǵy «Sarmad» etno-folklorlyq ansamblinde jumys isteıdi. Sonymen birge DD RECORDS tobynyń quramynda óner kórsetip júr.
Eske sala ketelik, buǵan deıin Atyraýda turatyn sheteldiktiń bolashaǵyn dombyrasyz elestete almaıtynyn jazǵan edik.
