Atyraýlyq oqýshy 80 eldiń valıýtasyn jınaǵan
Atyraýlyq oqýshy Artem Keorkov ár eldiń aqshasyn jınap júr. Qazir onyń jeke qorynda Qazaqstannyń ulttyq valıýtasy sanalatyn teńgemen birge 80 memlekettiń aqshasy bar, dep habarlaıdy Kazinform.
Onyń ákesi Sergeı de ár eldiń aqshasyn jınaıdy. Ol bul iske ulynyń qyzyǵýshylyǵyn oıatqan. Qazir Artem Keorkov Atyraý qalasyndaǵy №17 mektep-lıtseıinde oqıdy.
Oqýshynyń qorynda 1993 jyly qoldanysqa engizilgen teńgeniń alǵashqy nusqalary bar. Mereıtoılyq datalarǵa baılanysty shyǵarylǵan monetalar da saqtalǵan.
«Meniń qolyma tıgen alǵashqy banknot – 30 jyl buryn shyǵarylǵan 100 teńge. Bul banknotta qazaq hany – Abylaıdyń portreti beınelengen. Ony ákem týǵan kúnime syılaǵan edi. Sol sebepten, ony eń qymbat banknot dep esepteımin. Sodan beri ár eldiń aqshasyn jınaı bastadym. Qazaqtyń uly tulǵalalary Shoqan Ýálıhanov, Abaı Qunanbaıuly, Qurmanǵazy Saǵyrbaıuly, Súıinbaı Aronuly, Ábilqaıyr han beınelengen teńgeler, Eýropa, Afrıka, Ońtústik Afrıka, onyń ishinde Trınıdad jáne Tobago, Erıterııa, Djıbýtı sekildi 80 memlekettiń banknotyn jınadym», - deıdi Artem Keorkov.
Artem bos ýaqytyn tekke ótkizbeı, ózi jınaǵan aqshalardy zertteýge arnaıdy. Sóıtip, ár eldiń tarıhy men mádenıeti, tipti tabıǵaty týraly aqparatty izdeıdi.
«Bárinen elimizdiń ulttyq valıýtasy – teńgeniń jóni bólek. Teńgeniń dızaınyn unatamyn. Ákem ekeýmiz shaǵyn kórme uıymdastyryp, qatysýshylarǵa teńgeniń tarıhy, qundylyǵy týraly áńgimeleımiz. Elimizdiń ár óńirinde moneta almasatyn dostarym bar», - deıdi Keorkov.
