Atyraýǵa ózge elden kelgen 11 adamǵa bosqyn mártebesi berilgen

Atyraý oblysynda bosqyn mártebesin alý úshin ózge eldiń 96 adamy ótinish bildirgen. Alaıda, olardyń arasynan 11 adamǵa bosqyn mártebesin berýge sheshim qabyldanǵan, dep habarlaıdy Kazinform.

Atyraý oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń aıtýynsha, bosqyn mártebesin alýǵa ótinish bergen azamattar qatań baqylaýǵa alynǵan.

«Bıyl 1 jeltoqsanǵa deıin basqarmaǵa bosqyn mártebesin alý úshin 96 adamnan ótinish tústi. Pana izdep kelgenderdiń arasynan 11 adamǵa bosqyn mártebesi berildi. Al, 55 adamnyń bosqyn mártebesine bergen ótinishi qaıtarylyp, olar elderine oraldy. Ótinish bergen 4 adam yqtııarhat aldy», - dep habarlady Azamat Mámbetov.

Onyń deregine qaraǵanda, 11 adamnyń basqa óńirge kóship ketkeni anyqtalǵan. Sondaı-aq 9 adam eldiń aýmaǵynan eskertýsiz shyǵyp ketken.

«Pana izdegen adam retinde 6 adam tirkeldi. Onyń ishinde 1 er, 3 áıel, kámeletke tolmaǵan 2 bala bar. Olardyń bári – Ýkraına Respýblıkasynyń azamattary», - dep málim etti Azamat Mámbetov.

Eske sala ketelik, buǵan deıin Bıyl Atyraý oblysyna shetelden 272 etnıkalyq qazaq kóship kelgenin habarlaǵan edik. 

Basqarmanyń baspasóz qyzmetinen málim etkendeı, qandastardyń basym bóligi – 171 otbasyndaǵy 218 qazaq Ózbekstan Respýblıkasynan kelgen. Reseı Federatsııasynan 35 otbasy (44 adam), Qytaı Halyq Respýblıkasynan 1 otbasy (1 adam), Túrkimenstan Respýblıkasynan 3 otbasy (7 adam) jáne Monǵolııa Respýblıkasynan 2 otbasy (2 adam) atamekenge oralǵan.

Qandastar Atyraý qalasyna, Jylyoı, Maqat jáne Inder aýdanyna qonystanǵan.