Atyraýdyń mańynda taǵy da balyq qyrylyp qaldy
ATYRAÝ. KAZINFORM — Atyraý qalasynyń mańyndaǵy kanaldan bólinip qalǵan sýda balyqtyń qyrylǵany anyqtaldy. Ólgen balyqtyń salmaǵy — 69,5 keli.
Jaıyq-Kaspıı oblysaralyq basseındik balyq sharýashylyǵy ınspektsııasynyń málimetine súıensek, balyqtyń qyrylǵany keshe, 2 tamyzda anyqtalǵan.
«Atyraý qalasyna taıaý ornalasqan Erkinqala aýylynyń mańyndaǵy kóktemgi sý tasqyny kezinde bólinip qalǵan sýda balyqtardyń qyrylǵany týraly aqparat anyqtaldy. Bólingen sý Qara ózen kanalynan aqqan. Sýdaǵy temperatýrasy — 29 gradýs, ottegi mólsheri — 2 ml/dm³. Balyqtyń jalpy salmaǵy - 69,5 keli», -dep habarlady oblysaralyq ınspektsııa.
Osyǵan baılanysty ózara is-qımyl shemasyna sáıkes qurylǵan komıssııaǵa memlekettik organdardyń ókilderi engizildi.
Atyraý oblystyq ekologııa departamenti zerthanalyq zertteýler úshin sýda synama alyndy.
Al, ólgen balyqtardyń óleksesinen synama alý múmkin bolmady. Óıtkeni, ólekseler ydyrap ketken.
«Balyqtyń qyrylýynyń boljamdy sebebi — sýdaǵy ottegi mólsheriniń jetispeýshiligi. Otteginiń kontsentratsııasy 4 ml/dm3-ten tómen bolǵan kezde balyq qyrylady. Balyq ólekseleri sanıtarlyq normalarǵa sáıkes jınap alyndy», -dep málim etti oblysaralyq ınspektsııadan.
Eske sala ketelik, buǵan deıin Atyraýdyń mańyndaǵy kanalda balyq ólip jatqanyn habarlaǵan bolatynbyz.
Keıin balyq otteginiń jetispeýshiliginen qyrylýy múmkin ekeni aıtyldy.
