Atyraýdyń Mahambet aýdanynda Jaıyq mańyndaǵy jyralar ashylyp jatyr

ATYRAÝ. KAZINFORM – Atyraý oblysynyń Mahambet aýdanynda Jaıyq ózeni mańyndaǵy jyralar ashylyp jatyr.

Mahambet aýdandyq orman jáne janýarlar dúnıesin qorǵaý jónindegi mekeme dırektory Altynbek Amangeldiulynyń aıtýynsha, eldi mekenderdi Jaıyq ózeniniń tasqyn sýynan qorǵaý úshin osyndaı sheshim qabyldanǵan. 

«Jaıyq ózeniniń mańynda saı-jyralar kóp. Osy kezge deıin ózen sýyn burý úshin 12 jyra ashyldy. Qazir Qart Jaıyq, Oıynkól, Ólishyǵanaq, Besaǵash, Qorjyn, Qosózek, Jumaı, Besqala, Almaǵambet jáne basqa saı-jyralarǵa sý quıylyp jatyr. Ózen sýynyń kóp bóligi saı-jyralarǵa quıylsa, eldi mekenderdi tasqyn qaýpinen qorǵap qalýǵa bolady. Ázirge sýdan orman sharýashylyǵyna keri áser etetindeı zııan baıqalmaıdy», - deıdi Altynbek Amangeldiuly. 

Onyń pikirinshe, keıingi jyldary sý tapshylyǵynan orman sharýashylyǵy aýmaǵynda qýraǵan aǵash kóbeıgen. Sol sebepten, Mahambet aýdanynda jyralar qýraǵan aǵash qaldyqtary men topyraqtan tazartylǵan. 

Eske sala ketelik, buǵan deıin Atyraýdyń Mahambet aýdanynda Jaıyq ózeniniń jaıylmasyna sý shyqqanyn jazǵan bolatynbyz.