Atyraýdyń eks-ákiminiń isi: Sheneýnikterge berilgen jaza ózgerissiz qaldy

ATYRAÝ. KAZINFORM – Atyraý oblystyq sotynyń qylmystyq ister jónindegi sot alqasynda Atyraý qalasy ákimdiginiń burynǵy laýazymdy tulǵalaryna qatysty qylmystyq is qaraldy. Oǵan advokattardyń apellıatsııalyq shaǵymdary, Atyraý oblysy prokýrory orynbasarynyń apellıatsııalyq ótinishhaty sebep bolǵan.

Atyraý oblystyq sotynyń baspasóz qyzmetinen málim etkendeı, birinshi saty sotynyń úkimimen K.E. jáne Ý.K. QR Qylmystyq kodekstiń 361-babynyń 4-bóliginiń 3-tarmaǵy boıynsha kináli dep tanylǵan. Sot K.E.-ǵa 5 jyl, al Ý.K.-ǵa taǵylǵan aıyptyń az kólemi eskerilip, 3 jyl merzimge bas bostandyǵyn shekteý túrindegi jaza taǵaıyndalǵan.

Taǵy bir aıyptalýshy K.N. QR Qylmystyq kodeksiniń 361-babynyń 4-bóliginiń 3-tarmaǵymen, 369-babynyń 1-bóligimen kináli dep tanylyp, 6 jyl merzimge bas bostandyǵy shektelgen. Olar ómir boıyna memlekettik qyzmette laýazymdardy atqarý quqyǵynan aıyryldy.

– I.J. QR Qylmystyq kodeksiniń 361-babynyń 4-bóliginiń 3-tarmaǵy boıynsha onyń áreketterinde qylmystyq quqyq buzýshylyq quramynyń bolmaýyna baılanysty aqtaldy. Al Ý.K. 369-babynyń 3-bóligi, K.E. jáne I.J. 369-babynyń 1-bóligi, K.E., K.N. jáne I.J. 190-babynyń 4-bóliginiń 2-tarmaǵy boıynsha olardyń áreketterinde qylmystyq quqyq buzýshylyq quramynyń bolmaýyna baılanysty aqtaldy, - dep habarlady oblystyq sottyń baspasóz qyzmeti.

Sot burynǵy sheneýnikterge qatysty mynadaı jaıttardy anyqtaǵan. Ý.K. qala ákimi bola tura, jer qatynastary bóliminiń basshysy K.N. jáne sáýlet jáne qala qurylysy bóliminiń basshysy K.E.-ge rekreatsııalyq aımaqtaǵy 8 jer ýchaskesin berý týraly tapsyrma bergen. Sottalýshylar K.N. jáne K.E. ózara sóz baılasyp, rekreatsııalyq jáne sanıtarlyq aımaqtardan 18 jer ýchaskesin bergen. Osylaısha, K.N. jer komıssııasynyń hattamasynyń qosymshasyna komıssııa otyrysynda qaralǵan dep 18 ótinish týraly jalǵan málimetter engizgen.

Alaıda taǵylǵan aıyptyń keıbiri rastalmady. Birinshiden, I.J. qyzmettik ókilettikterdi asyra paıdalandy degen aıyppen onyń osy qylmysty jasaýǵa qatysy bar ekendigi týraly jetkilikti dálelder tergeýmen usynylmaǵan. Onyń qyzmettik ókilettigine rekreatsııalyq jáne sanıtarlyq aımaqtardaǵy jer ýchaskelerin berý máselesi kirmegen.

Ekinshiden, Ý.K., K.E. jáne I.J.-ǵa taǵylǵan aıyptaýda jer ýchaskesin tańdaý aktileri, jer komıssııasynyń hattamalary jáne taǵy basqa qujattarǵa jalǵan málimetter nemese túzetýler engizilgeni naqtylanbaǵan.

Úshinshiden, atalǵan sottalýshylardyń qujattarǵa jalǵan málimetter engizý faktileri anyqtalmaǵan.

Tórtinshiden, qylmystyq qýdalaý organy múlikti jymqyrý dálelderin usynbaǵan. Sottalýshylardyń birdeı áreketteri ókilettikterdi teris paıdalaný jáne alaıaqtyq retinde ártúrli baptar boıynsha dárejelengen.

Oblystyq sottyń apellıatsııalyq alqasy birinshi satydaǵy sot materıalyndaǵy osyndaı jaıttardy zerdeledi. Sonan soń birinshi saty sotynyń qorytyndylarymen kelisti.

– Sot úkimin ózgerýge nemese onyń kúshin joıýǵa negizder anyqtalmady. Osyǵan baılanysty qylmystyq ister jónindegi sot alqasynyń qaýlysymen birinshi saty sotynyń úkimi ózgerissiz qaldyryldy, -dep málim etti oblystyq sottyń baspasóz qyzmetinen.

Eske sala ketelik, budan buryn Atyraý qalasynyń eks-ákimi Qaırat Orazbaevtyń isine qatysty sot úkimi shyqqanyn jazǵan edik.

Keıin Atyraýdyń eks-ákiminiń isine baılanysty sheneýnikterge taǵylǵan qandaı aıyptaýlar rastalmaǵanyn habarladyq.