Atyraýdyń bilim salasynda 2,6 mlrd teńgeniń zań buzýshylyǵy anyqtalǵan
ATYRAÝ. KAZINFORM – Atyraý oblysynda bilim salasyndaǵy mekemelerge bólingen bıýdjet qarjysynyń tıimdiligi men maqsatty jumsalýyna memlekettik aýdıt júrgizildi. Aýdıt kezinde 12 bilim ordasy men mektep-ınternattarynyń jumysyna taldaý jasalǵan.
Atyraý oblystyq tekserý komıssııasynyń múshesi Janat Daýtalıevanyń aıtýynsha, 2022-2024 jyldarǵa júrgizilgen aýdıt nátıjesinde qarjylyq zańbuzýshylyq pen júıeli kemshilikter anyqtalǵan. Soǵan baılanysty bilim berý mekemeleriniń qarjylyq tártibi men josparlaý protsesin jetildirý, baqylaýdy kúsheıtý qajettigi týyndap otyr.
– Aýdıt qorytyndysmen anyqtalǵan zań buzýshylyqtardyń kólemi – 2,6 mlrd teńge. Onyń ishinde 970 mln teńgeniń qarjylyq buzýshylyǵy, 1,5 mlrd teńgeni tıimsiz josparlaý bar. Bıýdjettiń 143 mln teńgesi tıimsiz paıdalanylǵany anyqtaldy. Al rásimdik sıpattaǵy 172 kemshilik pen tártip buzýshylyq nazarǵa alyndy, - dedi Janat Daýtalıeva.
Onyń pikirine súıensek, kemshilikterdiń mynadaı sebebi bar. Birinshiden, bıýdjet qarjysyn josparlaý kezinde ótinimderdiń durystyǵy men negizdiligi qamtamasyz etilmegen. Ekinshiden, bıýdjetten bólingen transfertter nysanaly maqsatyna saı paıdalanylmaǵan. Úshinshiden, birqatar mektepte medıtsınalyq kabınetter lıtsenzııasyz jumys istegen. Medıtsınalyq kabınetter tıisti qural-jabdyqtarmen tolyq qamtamasyz etilmegen.
– Oqýshylardy ystyq tamaqpen qamtamasyz etý kezinde qoldanystaǵy zańnama talaptary tolyq saqtalmaǵany anyqtaldy. Keıbir ónim túrleri as mázirine engizilmeı kelgen. Mektepterde beınebaqylaý júıesi ornatylǵanymen, kameralar jazý fýnktsııasynsyz jumys isteıdi. Mundaı kameralardyń beınemuraǵatyna qol jetkizý múmkin bolmady. Al keıbir negizgi qorlar paıdalanylmaǵan kúıinde qoımada saqtalyp tur. Bul kemshilikter oblystyq bilim berý mekemelerindegi bıýdjet qarjysyn basqarýda qarjylyq tártip deńgeıiniń tıisti deńgeıde emestigin kórsetedi, - deıdi Janat Daýtalıeva.
Tekserý komıssıasy múshesiniń málimetinshe, aýdıt qorytyndysynan keıin 92 ákimshilik quqyqbuzýshylyq belgileri boıynsha qujattar Atyraý oblystyq ishki memlekettik aýdıt departamentine, memlekettik kirister basqarmasyna, medıtsınalyq jáne farmatsevtıkalyq baqylaý departamentine, bilim salasyndaǵy sapany qamtamasyz etý departamentine jiberilgen. Sondaı-aq, Atyraý oblystyq polıtsııa departamentine terrorıstik turǵydan osal nysandardyń qorǵalý talaptarynyń buzylýyna baılanysty qujattar tıisti shara qabyldaý úshin joldanǵan.
– Anyqtalǵan qatelikterdi joıý maqsatynda bilim berý salasyn jetildirýge baǵyttalǵan naqty usynystar berildi. Naqtylaı aıtqanda, bıýdjettik ótinimderdi jasaqtaý men bólýde dáldik pen negizdilikti arttyrý, mektepterde oqýshylardy ystyq tamaqpen qamtý, jylýmen jabdyqtaý jáne tazalyq qyzmetin aýtsorsıng arqyly uıymdastyrý usynyldy. Medıtsınalyq kabınetterdi tolyq lıtsenzııalaý, qajetti qural-jabdyqtarmen jabdyqtaý, paıdalanylmaı turǵan múliktiń naqty qajettiligin anyqtaýǵa nazar aýdaryldy, - dep málim etti Janat Daýtalıeva.
Eske sala ketelik, buǵan deıin Atyraýda bıýdjettik mekeme esepshileri jalaqy aýdarýda nege jıi qatelesetinin jazǵan bolatynbyz.