Atyraýdaǵy Prezıdent rezıdentsııasy balalar lageri retinde áli ashylǵan joq
ATYRAÝ. KAZINFORM — Prezıdent 2023 jylǵy aqpanda 5 óńirdegi resmı qonaqtarǵa arnalǵan rezıdentsııalardy balalardyń qajettiligine berýdi tapsyrǵan edi. Sol tapsyrmaǵa sáıkes Atyraýdaǵy burynǵy rezıdentsııany balalar lagerine laıyqtaý kózdelip otyr.
Buryn — rezıdentsııa, endi — lager
Memleket basshysynyń tapsyrmasy berilgenine 2 jyldan asty. Sol kezde Atyraý oblysynyń ákimi Serik Shápkenov burynǵy rezıdentsııa balalardy saýyqtyrý ortalyǵy retinde bir jyldan soń ashylatynyn aıtqan edi. Alaıda bul nysan áli iske qosylǵan joq.
Atyraý oblysy ákiminiń baspasóz hatshysy Rýslan Jumaǵazıevtiń málimetinshe, mekeme 200 orynǵa eseptelgen. Lagerge «Jas daryn» degen ataý berilgen.
— «Jas daryn» lagerin paıdalanýǵa berýge daıyndaý, jer telimine qatysty qujattaryn resimdeý jumysy aıaqtaldy. Nysanda gaz ben sý qubyry jelisiniń bolmaýyna baılanysty ony paıdalaný tek elektr energııasy esebinen múmkin bolady. Biraq bul ekonomıkalyq turǵydan tıimsiz. Lagerdi jyl boıy jáne tıimdi paıdalaný maqsatynda odan ári jańǵyrtý, onyń ishinde gaz jáne sýmen qamtý úshin ınjenerlik jeliler júrgizý, jatyn korpýstaryn, ashana men basqa da qurylystardy keńeıtý, balalardyń bos ýaqytyn ótkizýge arnalǵan qosymsha nysan salý jolymen qalypty jaı-kúıge keltirý josparlanyp otyr. Bul jumysty 2025 jyldyń birinshi jartysynda júrgizý, jıhaz ben basqa qural-jabdyqtardy jańartý kózdelgen, - dep habarlady Rýslan Jumaǵazıev.
Qazir burynǵy rezıdentsııanyń nysanaly maqsatyn ózgertý úshin qujattar daıyndalǵan. Nysanda qurylys jumystaryna daıyndyq júrgizilip jatyr.
Prezıdenttiń burynǵy rezıdentsııasy Mahambet aýdanyndaǵy Aqqaıyń aýylynda ornalasqan. Buryn munda resmı qonaqtardy qabyldaýǵa arnalǵan úı bolǵan.
Jaıyq ózeniniń oń jaǵalaýyndaǵy rezıdentsııaǵa jaqyn mańnan «Atyraý-Oral» tasjoly ótedi.
Burynǵy rezıdentsııa janynda shaǵyn jaǵajaı, úlken alma baǵy, tikushaq qonatyn alań bar. Ózenge deıin asfalt jol tóselgen.
Aqqaıyń qandaı aýyl?
Aqqaıyń — Beıbarys aýyldyq okrýginiń quramyndaǵy eldi meken. 2006 jylǵa deıin Sorochınko atalǵan. Sońǵy 35 jyldan beri turǵyndar sany edeýir azaıǵan.
Máselen, 1989 jyly eldi mekendegi turǵyndar sany 174 adam bolǵan. 1999 jyly 130 adam turǵan. Onyń ishinde 60 er, 70 áıel adam. Munda 2009 jyly 89 adam (46 er, 43 áıel) qalǵan.
Elimizdegi 2021 jylǵy sanaq qorytyndysymen atalǵan aýylda 78 adamnyń turatyny esepke alynǵan. Bir qyzyǵy, erlerdiń sany áıelderden 2 ese kóp bolyp shyqqan.
Okrýg ákimi Seıilbek Zulhashevtiń deregine qaraǵanda, qazir Aqqaıyńda 80 adam tirkelgen. Alaıda, naqty turatyndardyń sany — 25 adam.
— Bul eldi meken Atyraý qalasynan shamamen 30 shaqyrym qashyqtyqta ornalasqan. Al Beıbarys aýylynan tike jolmen júrse, qashyqtyq 5 shaqyrymdaı bolady. Munda ótken jyly feldsherlik-akýsherlik pýnkt salyndy. Ázirge paıdalanýǵa berilgen joq. Aýylda sý, jaryq, gaz jelileri bar. Aýyz sý Jaıyq ózeninen alynady. Turǵyndarǵa beriler aldynda sý tazartý qondyrǵysynda súzgiden ótkiziledi. Biraq aýyldaǵy 12 otbasy ǵana sýdyń aqysyn tóleıdi. Sol sebepten jazǵy sý qubyryn júrgizý tıimsiz bolyp otyr, — deıdi Seıilbek Zulhashev.
Onyń aıtýynsha, Aqqaıyń aýylyna qoǵamdyq kólik qatynamaıdy. Eldi mekende mektep pen balabaqsha, tipti dúken joq.
— Turǵyndardyń bárinde derlik jeke kólik bar. Azyq-túlikti, ózge de qajet zattardy Beıbarys aýylynan, Atyraý qalasynan ákeledi. Aýyl turǵyndary qoı men sıyr ustaıdy. Kókónis pen baqsha daqyldaryn ekpeıdi, — dedi Seıilbek Zulhashev.
Eske sala ketelik, budan buryn Atyraýda dombyra pishindes kontsert zaly qashan salynatynyn habarlaǵan bolatynbyz.
