Atyraýdaǵy qoqys polıgonynda órt bolyp, aýmaq byqsyp jatyr

ATYRAÝ.KAZINFORM — Atyraý qalasyndaǵy qoqys polıgonynda turmystyq qaldyqtar órtenip, byqsyp jatyr. Aldyn ala málimet boıynsha bul aýmaqtan tútin 7 sáýir saǵat 07:30–da shyqqan. 

TJD málimetinshe, oqıǵa ornyna kúshter men quraldar órt sóndirýshiler, «Arnaýly Avtobaza» JShS barlyǵy 65 adam, 35 tehnıka jedel túrde jumyldyryldy.

— Oqıǵa ornynda Atyraý oblysy TJD bastyǵynyń birinshi orynbasary jetekshilik etip jatyr. Qazirgi ýaqytta byqsýdy joıý jumystary jalǵasyp jatyr. Jaǵdaı baqylaýda. Zardap shekkender týraly aqparat túsken joq. Oqıǵa TJM baqylaýynda, — dep málimdedi departamenttiń baspasóz qyzmeti.

Aıta keteıik, qatty turmystyq qaldyqtar polıgony 1977 jyly paıdalanýǵa berilgen. Sońǵy aqparat boıynsha 35 gektar aýmaqqa 3,5 mln tonna turmystyq qatty qaldyq jınalǵan. 2024 jyly qala bıligi eski polıgondy jaýyp, ornyn rekýltıvatsııalaýǵa joba jasady. Alaıda bul jumys áli bastalmady.

Ákimdik birneshe jyl buryn jańa qoqys polıgonyn salý jumysyn da josparlaǵan edi. Qazir jobaǵa ózgerister engizilip jatyr.