Atyraýda júk vagondaryn shyǵaratyn zaýyt iske qosyldy
ATYRAÝ. KAZINFORM – Atyraý oblysynda ashylǵan jańa zaýytta júk vagondary qurastyryla bastady. Bul – munaıly óńirde iske asyrylǵan ınvestıtsııalyq jobanyń biri.
Ónerkásip jáne qurylys mınıstrligi ónerkásip komıtetiniń tóraǵasy Azamat Panbaevtyń aıtýyna qaraǵanda, sońǵy 5 jylda óńdeý ónerkásibiniń ortasha ósý qarqyny 4,5%-dy quraǵan. Onyń ishinde mashına jasaý salasyndaǵy ósim – 17,6%.
Al, Atyraý oblys ákiminiń orynbasary Marat Mýrzıevtiń deregine qaraǵanda, munaıly óńirde sheteldiktermen birlesken 1 myńnan astam kásiporyn jumys isteıdi. Mashına jasaý salasynda 150 iri, orta jáne shaǵyn bıznes nysany bar.
«Aımaqta munaı-hımııa ónimderin óńdeý baǵytynda iske asyrylyp jatqan iri jobalar bar. Endi mashına jasaý óndirisine nazar aýdarylyp otyr. Bul ınvestıtsııalyq jobanyń óńir úshin mańyzy zor. Birinshiden, «Teńiz» ken ornyndaǵy keleshek keńeıý jobasynyń aıaqtalýyna baılanysty bosaǵan jumysshylardy jumyspen qamtý máselesin ońtaıly sheshýge septigin tıgizedi. Ekinshiden, eksportqa baǵyttalǵan ónimderdiń ósimine yqpal etedi. Úshinshiden, óńirdiń áleýmettik-ekonomıkalyq damýyna serpin beredi», - deıdi Marat Mýrzıev.
Ákim orynbasarynyń aıtýynsha, jańa zaýytta jobaǵa sáıkes 6 myń vagon qurastyrý josparlanǵan. Investıtsııalyq jobanyń qýaty birtindep artqan kezde 2 700 jumys orny qurylady.
«Jańa zaýytta usta, dánekerleýshi, burǵylaýshy, toıtarýshy sekildi san túrli beıindegi mamandarǵa suranys artady. Munda vagon men tsısterna shyǵarý, jóndeý, tehnıkalyq qyzmet kórsetýge arnalǵan barlyq ınfraqurylymdy qamtıtyn vagon jasaý klasteri qurylady. Vagon qurastyrýǵa nemis stanoktary men elimizde óndirilgen materıaldar qoldanylady. Al óndiristik ónimder Eýropa jáne Baltyq elderine eksporttalady», - dep málim etti Marat Mýrzıev.
Zaýytty iske qosqan «Texol» kompanııalar tobynyń basshysy Shota Avhazovanyń málimetinshe, aldaǵy 10 jylda eldegi júk vagony parkindegi júk vagondary jyl saıyn 54 myńǵa qysqarady.
«Temirjol vagondary da tozady. Ortalyq Azııadaǵy júk bazasynyń ósý áleýetin eskerip, eski vagondardy jańasyna almastyryp, parkti jańartýdy kózdedik. Óıtkeni vagon parkine suranys artatyny daýsyz», - deıdi Shota Avhazova.
Kompanııa basshysynyń dereginshe, jańa óndiris ornynda ostik júktemesi 23,5 myń tonnany kóteretin jartylaı vagondar men platformalardy qurastyrý kózdelgen. Sondaı-aq júk vagonyn, munaı ónimin, suıytylǵan gazdy jáne ónerkásiptik júkterdi tasymaldaýǵa arnalǵan tsısterna qurastyrylady Zaýyt tolyq qýatyna 2027 jyly kóshedi.
Qazir zaýyttyń aýmaǵy 17 myń sharshy metr. Aldaǵy 4 jylda óndiristik alań 62 myń sharshy metrge deıin keńeıedi. Birneshe tsehta vagon qurastyrýǵa qajetti san alýan komponent jınaqtalady. Munda ortasha jáne kishi syıymdylyq pen salmaqtaǵy vagondardy quıý jelisi iske qosylǵan.
«Zaýytta jańa úlgilerdi óndiriske engizý qolǵa alynyp otyr. Qazir 25 myń arba men 13-6741 úlgisindegi artıkýlıatsııalanǵan fıtıng platformasynyń modelin engizý ázirlenip jatyr. Alda suıytylǵan kómirsýtekti gazdy tasymaldaýǵa arnalǵan tsısternalar shyǵaryla bastaıdy. Vagon qurastyrýǵa qajetti metall konstrýktsııalary Qaraǵandydan, moıyntirekter Stepnogordan, dońǵalaqty juptarǵa arnalǵan dıskiler men oster Ekibastuzdan ákelinedi», - dedi Shota Avhazova.
Zaýytta 70-ten astam maman jumysqa tartylǵan. Jyl sońyna deıin jumysshylar sanyn 180-ge jetkizý kózdelgen.
