Atyraýda jolaýshy tasymaldaıtyn kompanııalarǵa 3 aıda 4 mlrd teńge sýbsıdııa tólengen

ATYRAÝ. KAZINFORM – Atyraýda jolaýshy tasymaldaıtyn kompanııalarǵa 6 mlrd teńgeden astam sýbsıdııa bólingen. Ekinshi jarty jyldyqta qoǵamdyq kólikterdiń jumysynda qıyndyq týyndaýy múmkin.

«Atyraý qalalyq jolaýshylar tasymaly qaýymdastyǵy» jeke kásipkerler jáne zańdy tulǵalar birlestiginiń ókili Arsen Qanatovtyń aıtýynsha, munaıly shaharda 6 kompanııa jolaýshylarǵa qoǵamdyq kólik qyzmetin kórsetedi. Eń basty túıtkil – bıýdjetten sýbsıdııa tóleýdiń júıeli túrde keshigýi.

– 2024 jyly sýbsıdııanyń jalpy kólemi 6,7 mlrd teńgeni qurady. Sýbsıdııa qarjysy jyl basynda bólindi. Biraq, naýryz aıynan beri tólemder keshiktirildi. Biz ákimdikke, kólik bólimine, prokýratýraǵa hat jazdyq. Sonyń nátıjesinde avtobýs júrgizýshilerine maýsym, shilde aılary úshin jalaqynyń 50 paıyzyn ǵana tóledik. Qyrkúıek aıynda jaǵdaı odan da qıyn boldy. Jeltoqsannyń aıaǵynda ǵana barlyq qaryzdy ótedik. Óıtkeni, aqsha sol kezde tústi, - dep habarlady Arsen Qanatov. 

Onyń pikirinshe, endi byltyrǵy jaǵdaı qaıtalanbas úshin sýbsıdııa máselesi aldyn ala kóterilip otyr. Bıyl sýbsıdııaǵa 6 mlrd teńgeden astam qarjy bólingen. 

– Byltyr sýbsıdııalaý ádistemesi men erejelerine ózgertýler engizildi. Avtobýs júrgizýshileriniń jalaqysy kóterildi. Biraq bıyl sýbsıdııa qaıta esepteýsiz ótken jylǵy soma kóleminde ǵana bólindi. Jyldyń alǵashqy úsh aıynda sýbsıdııa qarjysynyń 4 mlrd teńgesi jumsaldy. Endi «Ekinshi jartyjyldyqta qalaı jumys isteımiz?» degen másele týyndap otyr. Bizdiń esepteýimiz boıynsha bıyl sýbsıdııaǵa 10 mlrd teńgege jýyq qarjy qajet. Búgingi kúnge deıin sýbsıdııany ulǵaıtý jónindegi komıssııanyń otyrysy ótkizilgen joq. Bul – uzaq protsess. Al biz maýsym aıynda qarjylandyrý máselesine baılanysty qıyndyqqa tap bolamyz dep esepteımin, - deıdi Arsen Qanatov.

Onyń aıtýynsha, jolaýshy tasymaldaýshylardy taǵy bir másele alańdatady. Bul – oqýshylar men stýdentterdiń jeńildetilgen jol júrý aqysyna ótemaqynyń tólenbeýi. 

– Atyraý qalalyq máslıhaty 2015 jyly jolaýshy tasymaldaýshylardyń bul shyǵynyn óteý týraly sheshim shyǵarǵan. Alaıda, osy kezge deıin qarjy bólinbedi. Biz osyǵan baılanysty únemi ákimdikke hat jazyp kelemiz. Ákimdik kólik bólimine, odan keıin atalǵan bólimge qarasty «Smart Atyraý» MKK-ǵa jiberedi. «Smart Atyraý» buǵan aqsha joq dep jaýap beredi. Biz «Ótemaqy bolmasa, tegin jol júrýdi alyp tastaımyz» deımiz. Ákimdik buǵan kelispeıdi. «Ótemaqyny tóleımiz» dep ýáde beredi. Alaıda eshqandaı nátıje joq. Osyǵan baılanysty prokýratýra 2022 jyly ákimdikke uıǵarym jibergen edi. Biraq jaǵdaı áli ózgergen joq, - dedi Arsen Qanatov.

Jolaýshylardy tasymaldaıtyn avtobýs júrgizýshileriniń jalaqysynda aıyrmashylyq bar. Osy isti qolǵa alǵan kásipkerler jalaqydaǵy aıyrmashylyqty ákimdikten talap etý úshin sotqa júginýi múmkin. 

Qazaqstan kásipkerleriniń quqyqtaryn qorǵaý jónindegi ýákildiń Atyraý oblysy boıynsha sektor meńgerýshisi, oblystyq kásipkerler palatasy dırektorynyń orynbasary Sársenbaı Joldybaevtyń pikirine súıensek, ákimdik talaptardy oryndamaǵan. 

– Tipti zańnamany buzyp otyr. Aldaǵy ýaqytta túıtkildi máselelerdi oń sheshý úshin «Atameken» Ulttyq kásipkerler palatasy janyndaǵy kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl jónindegi keńeske usynys joldaımyz. Óıtkeni osy tektes másele tek Atyraý oblysyna ǵana qatysty emes, - dep málim etti Sársenbaı Joldybaev.

Eske sala ketelik, budan buryn Atyraý ákimdigi meıramhana úshin berilgen jer telimin qaıtarýdy talap etkenin jazǵan edik.