Atyraýda jer telimderin zańsyz satqandar sottaldy

Atyraýda memleket ıeligindegi jer telimin satqandarǵa sot úkimi shyqty, dep habarlaıdy QazAqparat tilshisi.

Atyraý qalasynyń №2 sotynda alaıaqtyq deregimen memlekettik sot oryndaýshy M.Z.-ǵa, jeke tulǵalar R.N. men D.S.-ǵa qatysty qylmystyq is qaraldy. Bul is QR Qylmystyq kodeksiniń190-babynyń 4-bóligimen tergelgen.

«Memlekettik sot oryndaýshy M.Z. qyzmet babyn paıdalana otyryp, buryn sottalǵan R.N.-men jáne onyń burynǵy jubaıy D.S.-men birge birneshe ret memleket menshigindegi jer ýchaskelerin kórineý jalǵan satyp alý-satý sharttaryn jasasý arqyly memleket menshiginen shyǵarǵan. Aldaý jáne senimdi teris paıdalaný jolymen úshinshi tulǵalarǵa zańsyz satý arqyly memleketke asa iri mólsherde zalal keltirilgen», - dep habarlady atalǵan sottyń baspasóz qyzmeti.

Sot otyrysynda protsestik kelisim jasaqtaý týraly ótinishhat berilgen. Atalǵan ótinishhat qanaǵattandyrylyp, prokýror men sottalýshy arasynda protsestik kelisim jasaqtalǵan.

«Sot úkimimen M.Z. kináli dep tanylyp, oǵan memlekettik qyzmette laýazymdardy atqarý quqyǵynan ómir boıyna, 5 jyl merzimge bas bostandyǵynan aıyrý jazasy taǵaıyndaldy. R.N. kináli dep tanylyp, oǵan kommertsııalyq nemese ózge uıymdarda basqarý fýnktsııalaryn atqarý quqyǵynan 5 jyl merzimge, Qylmystyq kodeksiniń 60-babynyń 1-bóliginiń negizinde úkimderdiń jıyntyǵy boıynsha túpkilikti 5 jyl 6 aı merzimge bas bostandyǵynan aıyrý jazasy berildi. Qylmystyq kodeksiniń 74-babynyń 1-bóligine sáıkes, sottalǵandardyń jas balalary 14 jasqa tolǵanǵa deıin jazalaryn óteýi keıinge qaldyryldy. D.S. kináli dep tanylyp, oǵan kommertsııalyq nemese ózge uıymdarda basqarý fýnktsııalaryn atqarý quqyǵynan 5 jyl merzimge, 5 jyl merzimge bas bostandyǵynan aıyrý jazasy taǵaıyndaldy», - dep málim etti №2 sottyń baspasóz qyzmetinen.

Sot úkimi zańdy kúshine engen joq.