Atyraýda ústine elektrli mototsıkl qulaǵan 9 jasar bala aýrýhanaǵa jetkizildi

ATYRAÝ. KAZINFORM – Atyraýda 9 jasar balanyń ústine elektrli mototsıkl qulap ketti. 

Atyraý oblystyq polıtsııa departamentiniń baspasóz qyzmetinen málim etkendeı, búgin, 13 shildede bolǵan.

– Túngi saǵat 01:17 shamasynda Atyraý qalasyndaǵy Isataı-Mahambet alańynda 2016 jylǵy jasóspirimniń ústine elektrli mototsıkl qulady. Jasóspirim oblystyq balalar aýrýhanasyna jetkizildi, - dep habarlady departamenttiń baspasóz qyzmeti. 

Elektrli mototsıkldiń ıesi – 1985 jylǵy er adam.

– Atalǵan oqıǵaǵa baılanysty mototsıkl júrgizýshisi medıtsınalyq saraptamadan ótkizildi. Saraptamanyń qorytyndysymen QR Ákimshilik quqyq buzýshylyq týraly kodeksiniń 440-babyna (Alkogoldik ishimdikterdi ishý nemese qoǵamdyq oryndarǵa masań kúıde kelý) sáıkes ákimshilik hattama toltyrylyp, jaýapkershilikke tartyldy, - dep málim etti departamenttiń baspasóz qyzmetinen. 

Eske sala ketelik, buǵan deıin Atyraý oblysynda moped júrgizýshileri qandaı talaptardy buzyp júrgenin jazǵan edik.