Atyraýda sý jetkizýshi kásiporynǵa 5,5 mln teńge aıyppul salyndy

Atyraýda sýmen qamtıtyn kásiporyn tutynýshyny sýdan zańsyz ajyratyp tastaǵan. Osyǵan baılanysty monopolıst kásiporynǵa 5,5 mln teńge aıyppul salyndy, dep habarlaıdy Kazinform.

Tabıǵı monopolııalardy retteý komıtetiniń Atyraý oblysy boıynsha departamentine «Kaspııskaıa Kadrovaıa Assotsıatsııa» JShS-dan shaǵym túsken. Shaǵymda «Atyraý oblysy Sý Arnasy» KMK-nyń sýmen jabdyqtaýdy zańsyz ajyratqany aıtylǵan.

«2023 jylǵy 29 jeltoqsanda QR Tabıǵı monopolııalar týraly zańynyń 26-babynyń 2-tarmaǵynyń 4) tarmaqshasyn buzǵany úshin «Atyraý oblysy Sý Arnasy» KMK-ǵa qatysty ákimshilik is qozǵaldy. Atalǵan kásiporyn QR Ákimshilik quqyq buzýshylyq týraly kodeksiniń 164-babynyń 4-bóligimen ákimshilik jaýapkershilikke tartyldy. Kásiporynǵa jalpy somasy 5 mln 520 myń aıyppul salyndy», -dep habarlady departamenttiń baspasóz qyzmeti.

«Atyraý oblysy Sý Arnasy» KMK aıyppuldyń qysqartylǵan óndiriste kórsetilgen 50 paıyzyn jeti táýlik ishinde tóledi.

Eske sala ketelik, buǵan deıin Atyraýdyń burynǵy ákimi kommýnaldyq kásiporyndy basqaratynyn habarlaǵan edik.

Keıin Jaıyq ózeninde muz qatyp, Atyraýdaǵy sý sorý qondyrǵylary toqtap qaldy.

Sondaı-aq, Atyraýdyń sýsyz otyrǵanyna baılanysty ákimdikte komıssııa quryldy.

«Atyraý oblysy Sý Arnasy» ókili Jaıyqta muzdyń tyǵyz massasy 20 jyldan beri bolmaǵanyn aıtty.

Bir kúnnen keıin Atyraýdy sýmen qamtý tolyq qalpyna keltirildi.