Atyraýda sý tasqynynan zardap shekken kásipkerlerdiń bir toby ótemaqyny áli kútip júr
ATYRAÝ. KAZINFORM – Atyraý oblysynda sý tasqynynan zardap shekken kásipkerlerge ótemaqy áli tolyq tólenbegen. Ótemaqy almaǵandardyń arasynda Atyraý qalasynyń, Jylyoı men Mahambet aýdanynyń kásipkerleri bar.
Ulttyq ekonomıka mınıstrliginiń málimetine qaraǵanda, Atyraý oblysynyń sý tasqynynan zardap shekken kásipkerleri 423 ótinim bergen.
Al, Atyraý oblysy ákiminiń baspasóz qyzmetinen málim etkendeı, Jylyoı aýdanyndaǵy tasqynnan zardap shekken shaǵyn jáne orta bıznes sýbektilerinen ótemaqy alýǵa ótinim túsetini kútilip otyr.
«Qazir 5 materıal sot saraptaýynda jatyr. Al, 10 kásipker jyljymaıtyn múlikke qatysty jobalaý-smetalyq qujattama boıynsha memlekettik saraptamanyń qorytyndysyn kútip otyr. Taǵy 4 kásipker bekitilgen erejege sáıkes oblystyq komıssııanyń eskertýine baılanysty qujattardy rettep jatyr. Atyraý qalasy men Mahambet aýdanyndaǵy 9 kásipkerdiń ótinimine baılanysty sarapshylar jyljymaıtyn múlikke taldaý júrgizýdi qolǵa aldy», - dep habarlady ákimdiktiń baspasóz qyzmeti.
Atyraý oblysy ákiminiń orynbasary Marat Mýrzıevtiń málimetine súıensek, Jylyoı aýdanynyń ortalyǵy – Qulsary qalasyndaǵy sý tasqynynan 337 kásipker zardap shekkeni anyqtalǵan.
«Jylyoı aýdanyndaǵy kóktemgi sý tasqyny kezinde zardap shekken kásipkerlerdiń zalal somasyn óteýdi kózdeıtin óńirlik komıssııanyń 21 otyrysy ótkizildi. Komıssııa otyrysynda 302 kásipkerdiń zalal somasyn óteý týraly 345 ótinimi maquldandy. Keıbir kásipkerler 2-3 ótinimmen júgindi. Osy kezge deıin 288 ótinimge sáıkes 3 mlrd teńge kóleminde zalal somasy tolyqtaı óteldi. Endi 57 ótinim boıynsha respýblıkalyq bıýdjetten 1,1 mln teńge kóleminde qarjy kútilip otyr. Óńirlik komıssııanyń aldaǵy kezekti otyrysynda 35 kásipkerdiń ótinimi qaralyp, tıisinshe sheshim qabyldanady», - deıdi Marat Mýrzıev.
Qulsary qalasyndaǵy sý tasqynynan zardap shekken Nurgúl Ajaeva áli ótemaqy almaǵan. Ol bul týraly oblys ákiminiń orynbasary Marat Mýrzıevpen kezdesýde málim etti.
«Sý tasqynynan bizdiń kásibimiz zardap shekti. Osy kúnge deıin ótemaqy ala almaı júrmin. Jyl basynda kásibimizdi japqan edik. Al, sáýirde jumysymyzdy qaıta bastadyq. Sol kezde kásipti anamnyń atyna tirkegen edik. Anamnyń atynan óteaqy alýǵa ótinim berildi. Biraq, bizge ótemaqyny naýryz aıyna deıin tirkelgen bıznes ókilderi ala alady degen jaýap berilip, tóleýden bas tartyldy. Sý tasqyny saldarynan ǵımarat búlindi. Endi ne isteýim kerek?» - deıdi Nurgúl Ajaeva.
Atyraý óńirlik kásipkerler palatasynyń dırektry Nurlan Súıinbaevtyń aıtýynsha, oblystyq komıssııaǵa qaıtadan ótinim berý qajet. Óıtkeni, bul kásipkerlik nysany jańadan ashylmaǵan. Burynnan jumys istep turǵan. Al, oblystyq komıssııanyń ókilderi Nurgúl Ajaevanyń anasynyń ótinimin qaıta qaraýǵa kelisimin berdi.
Oblys ákimi orynbasary Marat Mýrzıevtiń deregine qaraǵanda, Atyraý qalasy men Mahambet aýdanynda jeke kásipkerligi, jaýapkershiligi shektelgen seriktestigi bar 9 kásipkerge 1,2 mlrd teńge kóleminde zalal kelgen.
Sondaı-aq, óńirdegi 73 sharýa qojalyǵynyń jyljymaıtyn múlkine kelgen zalal somasy aldyn ala esep boıynsha 2,9 mlrd teńgeni qurap otyr.
«Memleket tarapynan shaǵyn bızneske kómek kórsetilip keledi. Osy turǵydan aıtqanda, kásipkerlerdiń zalal somasyn tolyq óteý josparlanyp otyr. Birinshi kezekte bul múliktiń qalaı baǵalanatynyna baılanysty júzege asady», - dep málim etti Marat Mýrzıev.
Atyraý oblysynyń sottaryna 16 qyrkúıekke deıin sý tasqynynan zardap shekkenderden 133 talap aryz túsken. Onyń ishinde 15 shaǵymdanýshynyń talaby qanaǵattandyrylyp otyr.
Atyraý oblystyq soty ákimshilik ister jónindegi sot alqasynyń tóraǵasy Anargúl Salıhovanyń Kazinform agenttigine usynǵan málimetinshe súıensek, talap aryzdyń 129-y Jylyoı aýdanynan, al, 4-eýi Qyzylqoǵa aýdanynan berilgen.
«16 qyrkúıekke deıin sý tasqynynan zardap shekken turǵyndardan azamattyq ister boıynsha 56, ákimshilik iske qatysty 77 talap qoıý tústi. Shaǵymdanýshylar «Jylyoı aýdany ákimi apparaty» memlekettik mekemesi men turǵyndardyń arasynda jasalǵan kelisimshartty buzý, ákimdiktiń áreketin zańsyz dep taný, zardap shekkenderge kelgen zııandy baǵalaý jáne óteý jónindegi komıssııanyń áreketin zańsyz dep taný, qaıta baǵalaýdy mindetteý, úıdi apatty dep taný, kelgen zııandy óteý, materıaldyq shyǵyndy óndirý týraly talap qoıdy», - dedi Anargúl Salıhova.
Onyń deregine qaraǵanda, azamattyq ister boıynsha talaptardyń 55-i Jylyoı aýdandyq sotyna, 1-eýi Atyraý qalalyq sotyna túsken. Al, ákimshilik isterge qatysty talaptardyń 75-i Atyraý oblystyq mamandandyrylǵan aýdanaralyq ákimshilik sotyna, 2-eýi Qyzylqoǵa aýdandyq sotyna túsken.
«Azamattyq ister boıynsha talap qoıýshylardyń talaptary sotpen qaralý satysynda tur. Atyraý oblystyq mamandandyrylǵan aýdanaralyq ákimshilik sotymen 16 ákimshilik iske qatysty sheshim qabyldandy. Onyń ishinde 15 talap qoıýshynyń talaby qanaǵattandyryldy. Al, 1 talapty qanaǵattandyrýdan bas tartyldy. Atalǵan sotta 6 talap taraptardyń medıatsııalyq kelisimge kelýine baılanysty keri qaıtaryldy» - dep málim etti Anargúl Salıhova.
Eske sala ketelik, budan buryn Qulsaryda sý tasqynynan zardap shekken kásipkerlerge 2,6 mlrd teńge ótemaqy taǵaıyndalǵanyn jazǵan edik.
